“Реал” футболчиси итлари билан боғлиқ иш бўйича судга тортилади

Мадрид суди “Реал” клубининг француз ҳимоячиси Ферлан Мендига нисбатан унинг итларидан бири вояга етмаган болага ҳужум қилгани билан боғлиқ иш бўйича суд жараёнини белгилади. Бу ҳақда “Sport.es” нашри хабар берди.

Суд мажлиси жорий йилнинг 21 декабрь куни бўлиб ўтиши кутилмоқда. Прокуратура футболчига 1200 евро миқдорида жарима солиш ва жабрланувчиларга жами 5700 евро компенсация тўлаш мажбуриятини юклашни талаб қилмоқда.

Прокуратура маълумотларига кўра, Менди итларини тегишли назорат остида сақламаган ва автомобиль кирганидан кейин дарвозалар ёпилганини текширмаган. Шунингдек, итларга микрочип ўрнатилмагани, улар учун мажбурий суғурта расмийлаштирилмагани ва қутуришга қарши эмланмагани иддао қилинмоқда.

Ҳодиса 2023 йил 4 январь куни содир бўлган. Тергов маълумотларига кўра, футболчининг тўртта ити ҳовлисидан қочиб чиқиб кетган. Улардан бири итини сайр қилдириб юрган аёлга ҳужум қилган. Аёлнинг ити оғир жароҳат олгани сабабли кейинчалик уни эвтаназия қилишга тўғри келган.

17 ёшли бола аёлга ёрдам беришга уринган вақтда Мендининг итларидан бири унинг чап оёғини тишлаб олган. Жабрланувчига жароҳат жойига чок қўйилган бўлиб, унинг тикланиши 30 кун давом этган. Ҳужумга учраган аёлнинг ити ҳам жарроҳлик амалиётини бошдан кечиришига тўғри келган.

Маълумот учун, 31 ёшли Ферлан Менди 2019 йил ёзида Франциянинг “Лион” клубидан “Реал”га ўтган. Ҳимоячи жароҳати сабабли жорий мавсумда ҳозиргача бирорта ҳам учрашувда майдонга тушмаган.