Ramzan Qodirov iste’fo so‘radi

north_east

Putin va Qodirov orasidan “ola mushuk o‘tdi” – OAV

Ramzan Qodirov Checheniston rahbarligi lavozimidan ketish uchun ruxsat so‘radi. Bu haqda u kecha, 5 may kuni jurnalistlar uning iste’foga chiqishi haqidagi mish-mishlarga izoh so‘raganida so‘z ochdi.

“Men ham bu mish-mishlarni eshitdim. Har xil gaplar yozishyapti. Aksincha, men o‘zim lavozimdan ozod qilishlarini so‘ramoqdaman. Boshqa birovning o‘z tashabbuslari, o‘z qarashlari bo‘ladi. Umid qilamanki, mening iltimosim qo‘llab-quvvatlanadi”, dedi u.

Ma’lumot uchun, Ramzan Qodirov 2007 yil 5 aprelda Checheniston rahbari lavozimini egallagan bo‘lib, Rossiyadagi amaldagi mintaqa rahbarlari orasida eng uzoq ishlayotgan siyosatchi hisoblanadi. U so‘nggi marta 2021 yil sentyabr oyida qayta saylangan. Markaziy saylov komissiyasi ma’lumotlariga ko‘ra, Qodirov saylovda 99,7 foiz ovoz bilan g‘alaba qozongan, saylovdagi ishtirok darajasi esa 94,42 foizni tashkil qilgan. Uning hozirgi vakolat muddati 2026 yilgacha amal qiladi.

Shuningdek, “Medialogiya” tadqiqotiga ko‘ra, 2025 yil mart oyida Qodirov ijtimoiy tarmoqlarda eng ko‘p tilga olingan mintaqa rahbari bo‘ldi – u haqda 166,39 mingta xabar yozilgan.

Bungacha “Novaya gazeta. Yevropa” uning sog‘lig‘i keskin yomonlashgani haqida xabar bergan. Nashr manbalariga ko‘ra, Qodirov Chechenistondan tashqariga chiqmay qo‘ygan va deyarli butun vaqtini Grozniy shahridagi “Aymed” klinikasida shifokorlar nazorati ostida o‘tkazmoqda, hatto u yerda tunab qolmoqda. Ma’lum qilinishicha, 6 yil avval Qodirovda davolab bo‘lmaydigan oshqozon osti bezi nekrozi aniqlangan.

“Kavkazskiy uzel” nashrining yozishicha, Qodirov so‘nggi sakkiz yil ichida kamida bir necha bor o‘z iste’fosi haqida gapirgan. U 2017, 2020 va 2022 yillarda ham Checheniston rahbarligidan ketishga tayyorligini bildirgan.

Eslatib o‘tamiz, avvalroq Ramzan Qodirovning kenja o‘g‘li, 17 yoshli Adam Qodirov respublika Xavfsizlik Kengashi kotibi etib tayinlangandi. Undan oldinroq esa Adam Qodirov Ichki ishlar vazirligining mintaqaviy boshqarmasi kuratori lavozimini ham egallagan.