Mutlaq rekord: Ramzan Qodirov saylovda 99,85 foiz ovoz oldi

Ramzan Qodirov Checheniston rahbari saylovida rekord darajadagi 99,85 foiz ovoz oldi. Bu haqda Markaziy saylov komissiyasi (MSK) xabar berdi.

2016 yildagi saylovlarda u rasmiy ma’lumotlarga ko‘ra 94,8 foiz, 2021 yilda esa 99,7 foiz ovoz to‘plagan. Qodirov Checheniston Respublikasi rahbari lavozimini esa 2007 yildan beri egallab kelmoqda. 2025 yilning may oyida Rossiya Prezidenti Vladimir Putin bilan uchrashuv oldidan u o‘z iste’fosi masalasini muhokama qilmoqchi ekanini ma’lum qilgan edi. Biroq Qodirovning so‘zlariga ko‘ra, Putin unga: “Biz hali ishlashimiz va yana ishlashimiz kerak”, degan. 

“Oliy Bosh qo‘mondonning buyrug‘ini bajaryapman!” degan Checheniston rahbari. 

Bungacha “Novaya gazeta Yevropa” nashri manbalarga tayanib, me’da osti bezi nekrozi tashxisi qo‘yilgan Qodirovning salomatligi keskin yomonlashgani haqida xabar bergan. Nashr suhbatdoshlarining aytishicha, u respublikani tark etmay qo‘ygan va deyarli butun vaqtini Grozniydagi “Aymed” klinikasida shifokorlarning doimiy nazorati ostida o‘tkazmoqda.

Joriy yilning avgust oyida esa “Mojem ob’yasnit” loyihasi Checheniston rahbari omma oldida ancha kam ko‘rinish bera boshlagani haqida yozgan. Xususan, u Putin nutq so‘zlagan “Yedinaya Rossiya” s’ezdiga bormagan va deyarli 20 yillik boshqaruvi davomida birinchi marta Davlat dumasiga saylovlarda chechen yagona rossiyaliklar guruhiga boshchilik qilmagan. Shuningdek, Qodirovning jadvalidan uzoq intervyular va boshqa hududlarga tashriflar yo‘qolgan.

Eslatib o‘tamiz, avvalroq Ramzan Qodirov Ukrainaga qurol-yarog‘ yetkazib berayotgan va turlicha qo‘llab-quvvatlayotgan davlatlarga harbiy yo‘l bilan javob qaytarishga chaqirgandi.