Путин ва Зеленский учрашувга тайёр эмас – Эрдўған

Туркия Президенти Ражаб Тойиб Эрдўған Шанхай ҳамкорлик ташкилоти (ШҲТ) саммитидан қайтгач, Россия Президенти Владимир Путин ва Украина раҳбари Владимир Зеленский ҳозирча учрашувга тайёр эмаслигини маълум қилди. Бу ҳақда у “Milliyet” нашрига берган интервьюсида сўз очди.

Эрдўғаннинг сўзларига кўра, саммит доирасидаги учрашувда у Путин билан “адолатли тинчлик” асосида можарони тугатиш йўлларини муҳокама қилган. У Анқара музокаралар орқали муаммони ҳал қилиш тарафдори эканини таъкидлаган. 

“Биз босқичма-босқич музокаралар даражасини ошириш тарафдоримиз. Умидни аниқ натижаларга айлантириш учун бу масалани етакчилар даражасида кўтаришимиз зарур”, деган Эрдўған. 

Шунингдек, Туркия Президенти Путин ва Зеленскийнинг ёндашувларини ижобий баҳолаган. Эрдўған уларнинг иккаласи ҳам Истанбул музокараларини давом эттириш таклифига “нега энди йўқ” дея қарашганини, бироқ ҳозирча бунга тайёр эмасликларини айтиб ўтган. Шунингдек, Туркия раҳбари АҚШ Президенти Дональд Трампнинг Аляскадаги саммити ва Оқ уйда ўтган учрашувлари бўйича натижаларни ҳам Путин ва Зеленский билан муҳокама қилганини билдирган.

Эрдўғаннинг сўзлари Туркия Россия–Украина можаросида воситачилик ролини давом эттираётганини кўрсатмоқда. Истанбул музокараларини қайта жонлантириш ва раҳбарлар даражасидаги мулоқот тинчликка эришиш йўлида муҳим қадам бўлиши мумкин, бироқ томонларнинг ҳозирча бевосита учрашувга тайёр эмаслиги жараён қанча вақт олишини мавҳумлигича қолдирмоқда. Шу билан бирга, халқаро ҳамжамият дипломатик саъй-ҳаракатларнинг давом этишини кутмоқда, Трампнинг уч томонлама саммит таклифи эса алоҳида эътиборда турибди.

Эслатиб ўтамиз, Россия Президенти Владимир Путин кеча, 1 сентябрь куни Хитойнинг Тяньцзинь шаҳрида бўлиб ўтаётган Шанхай ҳамкорлик ташкилотининг 25-саммити доирасида туркиялик мавқедоши Ражаб Тойиб Эрдўған билан учрашганди. Томонлар асосий минтақавий масалаларни, хусусан, Яқин Шарқ, Шимолий Африка ва Транскавказдаги вазиятни муҳокама қилган. Россия раҳбари Анқарани Москва учун ишончли, вақт синовидан ўтган ҳамкор деб атаган. 

Путин Туркиянинг Украинадаги инқирозни ҳал қилишдаги муҳим ҳиссасини эслатган. Ўз навбатида, Туркия Президенти Ражаб Тойиб Эрдўған ҳам Истанбул музокараларини Украина можаросини тинч йўл билан ҳал этишга қўшган ҳиссаси деб билишини айтган.