Путин узоқ йиллик ҳамкорини ишдан олди

Россия Президенти Владимир Путин Президент маъмурияти раҳбари ўринбосари Дмитрий Козакни лавозимидан озод қилди. Путиннинг шу ҳақдаги тегишли фармони ҳуқуқий ҳужжатлар сайтида эълон қилинди.

Кремль ҳам Козак истеъфосини тасдиқлаган, у 17 сентябрь куни истеъфога чиқиш ҳақида ариза берган.

РБК маълумотларига кўра, Козак Путиннинг узоқ йиллик ҳамкорларидан биридир. Путин 1999 йилда бош вазир этиб тайинлангач, Козак ҳукумат аппарати раҳбарининг биринчи ўринбосари бўлган.

Бунгача Козак Ленинград шаҳар кенгашининг юридик бўлимини бошқарган, Санкт-Петербург мэриясининг юридик қўмитасини бошқарган ва 1998 йилда қисқа муддат шаҳар вице-губернатори лавозимида ишлаган.

Путин Россия Президенти бўлганидан кейин Козак Президентнинг Жанубий федерал округдаги вакили, минтақавий ривожланиш вазири ва Бош вазир ўринбосари лавозимларида ишлаган. У 2020 йилда маъмурият раҳбари ўринбосари Антон Вайнонинг ўрнини эгаллаган.

Козак, хусусан, постсовет мамлакатларига, шу жумладан, Украинага нисбатан сиёсат учун масъул эди. У Украинадаги можарони ҳал қилиш бўйича Норманд форматидаги (Россия, Германия, Франция ва Украина) музокараларида Россияга вакиллик қилди. Жорий йилнинг август ойида унинг бир қатор вазифалари Президент маъмурияти раҳбарининг биринчи ўринбосари Сергей Кириенкога ўтказилган эди.