Путин Трампни табриклади (видео)

Россия Президенти Владимир Путин АҚШнинг сайланган президенти Дональд Трампни лавозимга киришиши билан табриклаб, Москва ҳеч қачон Вашингтон билан мулоқотдан бош тортмаганини таъкидлади. Бу ҳақда бугун, 20 январь куни Россия етакчиси Хавфсизлик кенгаши аъзолари билан бўлиб ўтган тезкор йиғилишда маълум қилди.

“Москва Украина можароси бўйича АҚШнинг янги маъмурияти билан мулоқотга очиқ”, деган у.

Қайд этилишича, марказий мавзулардан бири АҚШдаги янги маъмурият билан муносабатларни яхшилаш бўлган.

“Биз АҚШнинг янги президенти ва унинг жамоаси аъзоларининг Россия билан тўғридан-тўғри алоқаларни тиклаш истаги тўғрисидаги баёнотларини, бизнинг айбимиз бўлмаган ҳолда, истеъфога чиққан маъмурият томонидан узилиб қолганини кўряпмиз”, деган Путин.

Унинг сўзларига кўра, Кремль Трампнинг учинчи жаҳон урушининг олдини олиш зарурлиги ҳақидаги баёнотларини ҳам эшитмоқда.

“Албатта, биз бу кайфиятни олқишлаймиз ва Қўшма Штатларнинг сайланган президентини лавозимга киришиши билан табриклаймиз”, дея қўшимча қилган Президент.

Унинг сўзларига кўра, Россия ҳеч қачон мулоқотдан бош тортмаган ва ҳар қандай Америка маъмурияти билан “силлиқ ҳамкорлик алоқаларини” сақлаб туришга доим тайёр бўлган.

Эслатиб ўтамиз, Швейцария Ташқи ишлар вазирлиги вакили Николас Бидо жорий йилнинг 10 январь куни чоп этилган маҳаллий “Le Теmps” нашрига берган интервьюсида АҚШнинг сайланган президенти Дональд Трамп ва Россия Президенти Владимир Путин ўртасида кутилаётган учрашув Швейцарияда бўлиб ўтиши мумкинлигини айтганди. Дипломатнинг сўзларига кўра, Швейцария АҚШ ва Россия раҳбарларининг саммитини сўраса, уни ўтказишга тайёр.