Путин Рамзан Қодиров билан учрашди (видео)

Бугун, 28 сентябрь куни Россия Президенти Владимир Путин Кремлда Чеченистон раҳбари Рамзан Қодиров билан учрашди. Бу ҳақда Кремль матбуот хизмати хабар берди.

Суҳбат давомида Украинадаги уруш мавзуси кўтарилаган ва Путин жангларда қатнашаётган чеченистонлик ҳарбийлар ва уларнинг оилаларига эзгу тилаклар билдирган.

“Биламан, сиз ҳамиша бу масалаларда, жумладан фронтда жасорат ва қаҳрамонлик кўрсатаётган йигитларимизнинг оилаларини қўллаб-қувватлайсиз”, деган Путин.

Путиннинг таъкидлашича, у чечен бўлинмалари бошқа тузилмалар билан яхши алоқада эканлигидан мамнун.

Ўз навбатида, Қодиров жангчиларнинг кайфияти яхши экани, уларга тегишли барча муаммолар ҳал этилаётганини айтиб ўтган. 

“Ҳеч қандай Abrams танклари биз учун қўрқинчли эмас. Шундай қилиб, бугунги кунда аскарлар яхши кайфиятда. Уларнинг қуроллари етарли. Биз шу кунгача мингта зирҳли техника сотиб олдик”, деган Қодиров.

Унинг сўзларига кўра, Чеченистон Россияда бешта полк ва учта батальон тузган ягона ҳудуд бўлиб, уларнинг барчаси бугун Украинадаги урушда иштирок этмоқда.

Эслатиб ўтамиз, сентябрь ойи ўрталарида Рамзан Қодировнинг буйрак трансплантацияси муваффақиятсиз якунлангани ҳақида хабарлар тарқалганди. Украина разведкаси ҳам Қодиров сурункали касалликларининг кучайиши туфайли оғир аҳволда эканини маълум қилди. Оммавий ахборот воситаларида Чеченистон раҳбарининг самолёти 15 сентябрь куни тахминан Грознийдан Москвага учгани ва уч кун давомида Россия пойтахтида қолгани, шунингдек, 17 сентябрь куни эрталаб Москвадаги марказий клиник шифохонаси ҳудудига Чеченистон давлат рақамларига эга автомобиллар келгани тўғрисида хабарлар тарқалганди. Россия Президенти матбуот котиби Дмитрий Песков брифинг чоғида журналистларнинг Рамзан Қодировнинг соғлиғи ҳақидаги саволларига жавобан, Кремль унинг соғлиғи ҳақида маълумотнома бермаслигини билдирган. Журналист Муҳаммад Ториев Кремль Қодировдан кейин унинг ўрнини эгаллаши мумкин бўлган номзодларни кўриб чиқаётганини маълум қилган.