Putin Prigojinning dafn marosimiga boradimi?

“Vagner” xususiy harbiy kompaniyasi asoschisi Yevgeniy Prigojinning dafn marosimi haqida Kremlda hech qanday ma’lumot yo‘q, unda Rossiya Prezidenti Vladimir Putinning ishtirok etishi “ko‘zda tutilmagan”. Bu haqda davlat rahbari matbuot kotibi Dmitriy Peskov jurnalistlarga bergan intervyusida ma’lum qildi. 

“Prezidentning hozir bo‘lishi ko‘zda tutilmagan, bizda dafn marosimi haqida aniq ma’lumot yo‘q, bu masala bo‘yicha qarorni qarindoshlar va do‘stlar qabul qiladi, bu yerda ularsiz hech narsa deya olmaymiz”, deydi Peskov. 

Eslatib o‘tamiz, 23 avgust kuni Rossiyaning Tver viloyatida halokatga uchragan samolyot bortida “Vagner” rahbari Yevgeniy Prigojin va uning hammuassisi Dmitriy Utkin bo‘lgani, bortdagi barcha 10 yo‘lovchi halok bo‘lgani aytilgandi. 24 avgust kuni Rossiya Prezidenti Vladimir Putin samolyot halokatida halok bo‘lganlarning oila a’zolariga hamdardlik bildirgan va Prigojinni iste’dodli tadbirkor, biroq taqdiri og‘ir inson bo‘lgani va hayotida jiddiy xatolarga yo‘l qo‘yganini qayd etgandi. G‘arb davlatlari yetakchilari va rasmiylari esa mazkur halokat ortida Putin turganini istisno qilmasligini aytgan. 

Masalan, Yevrokomissiya “Vagner” rahbari Yevgeniy Prigojinning o‘limi haqidagi ma’lumotlarning ishonchliligiga shubha qilayotgan bo‘lsa, Polsha Bosh vaziri Mateush Moravetskiy endilikda “Vagner” xususiy harbiy kompaniyasi ustidan nazorat to‘g‘ridan-to‘g‘ri Putinga o‘tishini taxmin qilmoqda.

Kecha, 27 avgust kuni Rossiya Federatsiyasi Tergov qo‘mitasi “Vagner” xususiy harbiy kompaniyasi asoschisi Yevgeniy Prigojinni Tver viloyatidagi aviahalokatda halok bo‘lganini tasdiqladi.