Пул етишмаслиги хотира ва мия фаолиятини ёмонлаштиради – тадқиқот

Доимий молиявий қийинчиликлар 53 ёшга бориб фикрлаш тезлигининг пасайишига ва хотира сусайишига олиб келади. Бу ҳақда олимларнинг тадқиқотларига таяниб, “News-Medical” хабар берди.

Британиялик олимларнинг кенг кўламли тадқиқоти узоқ муддатли молиявий беқарорлик ва бош миянинг тезлашган қариши ўртасида тўғридан тўғри боғлиқлик борлигини исботлади. Мутахассислар бир неча ўн йиллар давомида кузатилган беш мингдан ортиқ кишининг маълумотларини таҳлил қилиб чиққан.

Аниқланишича, 26 ёшдан 53 ёшгача бўлган даврда мунтазам равишда камбағаллик ва маблағ етишмаслигига дуч келган одамлар молиявий тўқ тенгдошларига нисбатан вербал хотиранинг пастроқ кўрсаткичларини ва ахборотни қайта ишлашнинг секинлашганини намоён этган. Эркакларда даромаднинг жиддий етишмаслиги фикрлаш тезлиги билан боғлиқ энг катта муаммоларни келтириб чиқарган.

Бундан ташқари, МРТ-сканерлаш шуни кўрсатдики, узоқ давом этган молиявий муҳтожлик оғир болалик ёки Альцгеймер касаллигига генетик мойиллик билан бирлашганда, гиппокампнинг тезроқ атрофияга учрашига ва мия умумий ҳажмининг кичрайишига олиб келади. Муаллифлар пул туфайли доимий стресс организмнинг когнитив ресурсларини кексалик етиб келгунига қадар анча вақт илгари камайтиришини таъкидламоқда.

Эслатиб ўтамиз, аввалроқ музейлар, театрлар, кино ва концертларга мунтазам бориш 50 ёшдан ошган одамларнинг физиологик қаришини секинлаштириши мумкинлиги ҳақида хабар берилган эди.