ПСЖ трансфер ойнасини рекорд нархдаги харид билан якунлади

Франциянинг ПСЖ клуби “Айнтрахт” футболчиси Рандаль Коло Муани билан шартнома имзолади. Бу ҳақда Париж клуби матбуот хизмати хабар берди. 

Маълум қилинишича, Франция терма жамоаси аъзоси бўлган 24 ёшли футболчи ПСЖ билан 2028 йилнинг ёзига қадар мўлжалланган 5 йиллик шартнома имзолаган. Форвард Париж клубида 23-рақамда майдонга тушади. 

ОАВга кўра, битим суммаси тахминан 75 миллион еврони ташкил қилиб, унга Коло Муанининг бонуслари ҳам қўшиб ҳисобланади. Бироқ Франкфурт клуби ушбу трансфер ўз тарихидаги рекорд сумма – 95 миллион евро эканини айтмоқда. 

Маълумот учун, “Transfermarkt” портали футболчининг тахминий нархини 80 миллион евро деб баҳолаган. Рандаль Коло Муани ўтган 2022/2023 йилги мавсумда Германия клуби номидан 46 та ўйинда майдонга тушиб, 23 та гол ва 17 та голли узатмани амалга оширган. 

Ёзги трансфер ойнасида ПСЖ таркибига ҳимоячилар Милан Шкриньяр ва Лукас Эрнандес, ярим ҳимоячилар Марко Асенсио ва Мануел Угарте ҳамда ҳужумчилар Усмон Дембеле, Гонсалу Рамуш ва Бредли Баркола қўшилди.