Педофилларнинг дунёдаги энг катта платформаси йўқ қилинди

Болаларни жинсий эксплуатация қилиш бўйича энг йирик платформа – Kidflix йўқ қилинди. Мазкур платформа тахминан 2 миллион фойдаланувчига эга эди. Бу ҳақда Европолнинг расмий баёноти эълон қилинди.

Европа мамлакатларининг ҳуқуқни муҳофаза қилувчи органлари Европа Иттифоқининг Ҳуқуқни муҳофаза қилиш соҳасидаги ҳамкорлик агентлиги (Европол) кўмагида Stream код номли халқаро операцияни ўтказган. Натижада болаларга нисбатан жинсий зўравонлик акс этган материалларни тарқатиш бўйича дунёдаги энг йирик платформалардан бири бўлган Kidflix ёпилган.

Тергов 2022 йил апрель ойида бошланган. Ўшандан бери бутун дунёдан тахминан 1 миллион 800 минг фойдаланувчи платформада рўйхатдан ўтган. Жорий йилнинг 11 март куни Германия ва Нидерландия ҳукумати Kidflix серверини мусодара қилган. Унда 72 мингга яқин видеофайл мавжуд бўлган.

Ҳозирги вақтда 1393 нафар гумонланувчининг шахси аниқланган. Тақиқланган материалларни тарқатишда иштирок этган 79 киши ҳибсга олинган. Тергов давомида жабрланган 39 нафар вояга етмаган бола ҳимояга олинган. 3 мингдан ортиқ электрон қурилмалар мусодара қилинган, 91 мингдан ортиқ ноёб видеофайллар топилган.

Платформада фойдаланувчилар нафақат видео юклаб олишлари, балки жонли эфирлар олиб боришлари ҳам мумкин бўлган. Материалларга кириш токен тизими орқали амалга оширилган – токенлар контентни юклаш ва текшириш эвазига ишлаб топилган. Тўловлар криптовалюта орқали амалга оширилган.

Платформадаги видеолар бир нечта сифатда мавжуд бўлган. Бу фойдаланувчиларга материалларни олдиндан кўриб чиқиш ва юқори сифатдаги версияни очиш учун тўлов қилиш имконини берган. Платформа 2021 йилдан бери фойдаланувчилар жами 91 мингдан ортиқ видеони, умумий давомийлиги 6 минг соатдан ошиқ материални юклаган.

Stream операцияси Европол тарихида интернетдаги болаларга қарши жиноятларга қарши кураш бўйича энг йириги бўлган. Агентлик мутахассислари оператив ёрдам кўрсатган, барча маълумотларни қайта текширган, мамлакатлар ўртасида ахборот алмашинувини мувофиқлаштирган ва миллий идораларга терговларда ёрдам берган.

Операцияда 35 дан ортиқ давлат иштирок этган, жумладан: Германия, Нидерландия, Франция, Италия, Испания, Бельгия, Австрия, Австралия, Канада, АҚШ, Буюк Британия, Польша, Швеция, Дания, Финляндия, Ирландия, Чехия, Болгария, Янги Зеландия, Норвегия, Португалия, Швейцария, Руминия, Сербия, Латвия, Литва, Эстония, Греция, Хорватия, Мальта, Люксембург, Албания, Колумбия, Грузия ва Кипр.