Паркентда 1,8 млрд долларлик лойиҳалар амалга оширилади

Тошкент вилоятининг Паркент туманида туризмни ривожлантириш мақсадида қиймати 1 миллиард 800 миллион доллар бўлган 52 та лойиҳа амалга оширилади. Бу ҳақда бугун, 18 июнь куни Президент Шавкат Мирзиёевнинг ҳудудга ташрифи давомида маълум қилинди.

Қайд этилишича, ушбу лойиҳалар ишга тушса, натижада 3300 та иш ўрни яратилади ва 1 миллион нафар сайёҳга хизмат кўрсатилади. Бу ерда Австрия компанияси томонидан 1200 гектарда тоғ-чанғи курортини қуриш ҳам режалаштирилган. Давлат раҳбарига ушбу лойиҳа ҳақида ахборот берилди. Унинг доирасида 3, 4 ва 5 юлдузли меҳмонхоналар, чанғи учиш ва осма дор йўли, шалелар, пикник майдони, ресторанлар, соғломлаштириш хизматлари ташкил этилади.

Таъкидланишича, лойиҳа уч босқичда амалга оширилади ва тўлиқ қувватда кунига 15 минг нафар сайёҳни қабул қилиш имконига эга бўлади. 600 га яқин сервис мажмуалари ташкил этилади. Мавсумий хизматлар билан бирга 10 мингга яқин иш ўрни яратилади. Умуман, бу маскан, Бўстонлиқдаги “Амирсой” курорти каби Тошкент вилоятининг йирик туризм манзилларидан бирига айланади.

Эслатиб ўтамиз, Президент Шавкат Мирзиёев бугун, 18 июнь куни “Тошкент-Шарқий” аэропорти қурилишини ҳам кўздан кечирганди.