“Пахтакор” Россия клуби футболчисини ижарага олди

Россиянинг “Торпедо” клуби футболчиси Ҳожимат Эркинов фаолиятини “Пахтакор”да давом эттиради. Бу ҳақда клуб Ахборот хизмати хабар берди.

Қайд этилишича, “Пахтакор” 2022 йилда Россия клубига трансфер қилинган тарбияланувчисини бир йиллик ижара шартномаси асосида жамоа сафига қўшиб олган.

Шунингдек, 22 ёшли Эркиновнинг ўзи бундан хурсанд экани ва эндиликда ўзи тарбияланган клуб шаънини муносиб ҳимоя қилиш истагидалигини билдирган.

Таъкидлаш жоизки, Ҳожимат Эркиновга Беларуснинг “Минск” клубидан ҳам жиддий таклиф бўлганди. Шунингдек, маҳаллий жамоалардан Наманганнинг “Навбаҳор” клуби ҳам футболчини ўз таркибига қўшиб олишни мақсад қилганди. Якунда Эркинов “Пахтакор” вариантини танлади.

“Мени тарбиялаган қадрдон жамоам “Пахтакор”га қайтганимдан хурсандман. Суперлиганинг 2-даврасида чемпионлик анъанасини давом эттиришда ёрдам беришни хоҳлайман”, дейди футболчи.

Маълумот учун, Эркинов 2022/2023 йилги мавсумда Россия Премьер-лигасидаги 20 та ўйинда битта ассистга муаллифлик қилди. “Торпедо” эса 13 очко билан сўнгги 16-ўринни эгаллаб, РПЛни тарк этди.