Осиёнинг 2 жамоаси ЖЧга йўл олди

Кеча, 14 октябрь куни Жаҳон чемпионатига саралашнинг Осиё қитъаси бўйича 4-босқичи якунланди. Унда Қатар ва Саудия Арабистони терма жамоалари 2026 йилги футбол бўйича Жаҳон чемпионатига йўлланмани қўлга киритди.

Осиё саралашининг тўртинчи босқичида олтита жамоа икки гуруҳга бўлинган бўлиб, ҳар бир гуруҳ ғолиби Қатар ва Саудия Арабистони тўғридан тўғри Жаҳон чемпионатига чиқиш ҳуқуқини қўлга киритди.

“А” гуруҳида Қатар Бирлашган Араб Амирликларини (БАА) мағлуб этиб, мундиал йўлланмасини қўлга киритди. ЖЧ-2022 мезбонлари бўлган Қатар ўйиннинг иккинчи бўлимида Акрам Афифнинг жарима зарбасидан сўнг Боуалем Хоуки бош билан ҳисобни очди. 74-дақиқада эса Педру Мигел Афифнинг узатмасидан сўнг натижани 2:0 га етказди. 89-дақиқада Тарек Салман майдондан четлатилгач, БАА бир гол уришга эришди, бироқ якунда Қатар ғалабани сақлаб қолди. Бу ғалаба Қатар терма жамоасига кетма-кет иккинчи марта Жаҳон чемпионатида иштирок этиш имконини берди.

“Б” гуруҳида эса Саудия Арабистони Ироқ билан 0:0 ҳисобида дуранг ўйнади. Бу натижа Саудияга мундиал йўлланмасини қўлга киритиш учун етарли бўлди. Саудия тўпга эгаликда устун бўлиб, бир неча бор гол уриш имкониятига эга бўлди, бироқ рақиб дарвозабони Наваф ал-Акидининг маҳоратли ўйини сабаб учрашувда ҳисоб очилмади. Шунга қарамай, бу дуранг Саудия Арабистонини кетма-кет учинчи, умумий ҳисобда эса еттинчи бор Жаҳон чемпионатига олиб чиқди.

Маълумот учун, энди Ироқ ва БАА кейинги ойда икки ўйиндан иборат плей-офф баҳсида тўқнаш келади. Ушбу жуфтликнинг ғолиби 2026 йил март ойида конфедерациялараро плей-офф босқичида иштирок этади.

Эслатиб ўтамиз, аввалроқ 525 минг аҳолига эга давлат Кабо-Верде ўз тарихида илк бор Жаҳон чемпионатига йўлланмани қўлга киритган эди.