Кабо-Верде илк бор Жаҳон чемпионатига чиқди

Кеча, 13 октябрь куни Кабо-Верде терма жамоаси Праядаги “Миллий” стадионда Эсватини устидан 3:0 ҳисобида ғалаба қозонди. Бу ғалаба Кабо-Вердега  ўз тарихида илк бор Жаҳон чемпионатида иштирок этиш имконини тақдим этди.

Африканинг ғарбий қисмида жойлашган вулқон ороллари Африка учун ажратилган тўққизта автоматик йўлланмадан бирини қўлга киритди. Шу тариқа, Кабо-Верде 2018 йилда Исландиядан кейин турнирда иштирок этадиган аҳолиси энг кам (525 минг) давлат сифатида тарихга киради.

Кабо-Верде ҳал қилувчи ўйинда кучли футбол намойиш этди. 48-дақиқада Дайлон Ливрамент, 54-дақиқада Вилли Семеду ва учрашувнинг асосий вақтига қўшиб берилган дақиқаларда Стопира киритган голлар жамоага “Д” гуруҳида биринчи ўринни ва мундиал йўлланмасини таъминлади.

FIFA маълумотларига кўра, Кабо-Верде ўйини учун чипталар рекорд даражада тез сотилган, ҳукумат эса халқ ушбу тарихий воқеани биргаликда нишонлаши учун ярим кунлик таътил эълон қилган.

Эслатиб ўтамиз, аввалроқ Гана терма жамоаси ҳам йўлланмани қўлга киритиб, Тунис, Жазоир, Миср ва Марокашдан кейин мундиал йўлланмасини олган бешинчи Африка жамоасига айланди. Энди улар қаторига Кабо-Верде ҳам қўшилди.