“Охиригача курашамиз”. Депутат Ғаниев "UZAUTOMOTORS”га жавоб қайтарди

Жамият 23756
image

Эътибор марказида яна “UZAUTOMOTORS” АЖ. Жорий йилнинг март ойида "UZAUTOMOTORS” Damas ва Spark автомобилларининг нархини 21 фоизгача, Nexia, Cobalt ва Lacetti нархини 15 фоизгача оширган эди. Malibu 2, Tracker, Trailblazer, Equinox, Traverse ва Tahoe нархлари ўзгартиришсиз қолдирилган. Ушбу воқелик жамоатчилик, депутатлар орасида муҳокамаларга сабаб бўлди. Олий Мажлис Қонунчилик палатасининг бир гуруҳ аъзолари "UZAUTOMOTORS” монополиясига қарши чиқди, жамият билан баҳсга киришди. 

Орадан кўп ўтмай мамлакатда коронавирус билан боғлиқ илк ҳолат қайд этилгач, бошқа масалалар қаторида автомобиллар нархининг ошиши ҳам пандемия фонида қолиб кетгандек бўлди. Лекин, орадан беш ой ўтиб депутатлар ва Монополияга қарши курашиш қўмитаси мазкур масаланинг ечими бўйича яна ҳаракатга тушди. Қўмита томонидан “UZAUTOMOTORS” АЖда “Рақобат тўғрисида”ги қонун талаблари бузилиши бўйича иш қўзғатди. Унинг сўнгги муҳокамаси кеча, 19 август куни бўлиб ўтди. Муҳокамага жамиятдан вакил таклиф этилишига қарамай, ҳеч ким қатнашмаган. 

Текширувлар натижасида  ишлаб чиқарилаётган енгил автомобилларнинг базавий улгуржи ва чакана сотиш нархларининг шакллантирилишида харажатларни асоссиз ошириб киритиш орқали монопол юқори нарх қўлланилгани, натижада енгил автомобилларнинг нархлари ўртача 10,29 фоизга ошириб шакллантирилгани аниқланган. 

Шунингдек, истеъмолчиларга енгил автомобилларни дилерлар орқали реализация қилишда Истеъмолчилар ва хўжалик юритувчи субъектларнинг ҳуқуқлари ва манфаатларини камситишга олиб келадиган ҳаракатларни содир этиш, шу жумладан шартнома предметига тааллуқли бўлмаган шартларни, рақобатнинг чекланишига олиб келадиган ёки олиб келиши мумкин бўлган бошқа ҳаракатларни ҳамда автомобилларни реализация қилиш бозорига бошқа хўжалик юритувчи субъектларнинг киришига тўсиқлар қўйиш орқали устун мавқеини суистеъмол қилиш ҳолатлари аниқланган.

Махсус комиссия томонидан юқоридаги ҳолатлар атрофлича ўрганилиб, “UZAUTOMOTORS” АЖга қонунбузилиш ҳолатларини бартараф этиш тўғрисида бажарилиши мажбурий бўлган кўрсатмалар берилди.

Уларнинг энг асосийси эса нарх билан боғлиқ бўлиб:
 
•    Spark русумли автомобиль LS M/T модификацияси чакана нархидан 3 002 010 сўм ва LT A/T модификацияси чакана нархидан 3 563 704 сўм;

•    Nexia 3 русумли автомобиль LТ M/T модификацияси чакана нархидан 3 112 039 сўм ва LTZ A/T модификацияси чакана нархидан 3 792 325 сўм;

•    Cobalt русумли автомобиль LТ M/T модификацияси чакана нархидан 4 404 493 сўм ва LTZ A/T модификацияси чакана нархидан 10 526 707 сўм;

•    Gentra русумли автомобиль SX M/T модификацияси чакана нархидан 13 825 248 сўм, SX M/T CNG модификацияси чакана нархидан 13 718 618 сўм ва CDX A/T Plus модификацияси чакана нархидан 19 806 932 сўм;

•    Damas русумли автомобиль DLX модификацияси чакана нархидан 15 458 984 сўм, VAN модификацияси чакана нархидан 15 746 315 сўм ва Labo модификацияси чакана нархидан 13 052 930 сўм асоссиз киритилган харажатларни чегириш ва ушбу маблағларни истеъмолчиларга қайтариш белгиланган. 

Бироқ, бугун, 20 август куни “UZAUTOMOTORS” АЖ баёнот билан чиқиб, ушбу шартларни бажармаслигини, нархларни ҳам туширмаслигини, аксинча, сўнгги нуқтани суд қўйишини маълум қилди

Бунга нисбатан “UZAUTOMOTORS” АЖ монополиясига тиш-тирноғи билан қарши чиқаётган депутатлардан бири Дониёр Ғаниев ҳам муносабат билдирди. У шундай дейди: 

“Кутганимиздек “UZAUTOMOTORS” Монополияга қарши курашиш қўмитаси қарори устидан судга шикоят қилишини эълон қилибди.  

Нима ҳам деймиз.  Фақатгина одил судлов бўлишини ҳамда текширув давомида аниқланган факт ва рақамлар суд томонидан инобатга олинишини умид қилиб қоламиз.  

“UZAUTOMOTORS” суд орқали жараённи қанчалик чўзишга ва шу орқали масалани кун тартибидан чиқаришга ҳаракат қилмасин, биз барибир қўмита билан биргаликда компания билан охиригача курашамиз”. 

Qalampir.uz Tahririyati
Мақолага баҳо беринг
Баҳолаганлар: 0
Рейтинг: 3
t
×