Ноодатий усулда наша етиштириб, интернетда сотган шахс ушланди 

Тошкент вилоятида уй шароитида гидропоника усулида гиёҳвандлик ўсимликларини етиштириб, интернет орқали сотиш билан шуғулланган шахс қўлга олинди. Бу ҳақда Давлат хавфсизлик хизмати хабар берди. 

Ўтказилган тезкор-қидирув тадбирларида 1996 йилда Тошкент шаҳрида туғилган, муқаддам судланган фуқаронинг М.Улуғбек туманида жойлашган кўп қаватли уйлардан биридаги вақтинчалик яшаш хонадони кўздан кечирилганда, пластик идишда сақланаётган гиёҳвандлик воситаси, 300 дона зип-пакет, изоленталар ҳамда электрон торози борлиги маълум бўлган. Дастлабки суриштирув давомида у ўзининг онасига тегишли Тошкент туманидаги хонадонда гиёҳвандлик ўсимликларини етиштираётганлиги аниқланган. 

Ушбу манзил кўздан кечирилганда 10 туп каннабис ўсимлиги, 1 туп қуритилган гиёҳвандлик воситаси, шунингдек, уларни парваришлашда фойдаланилган кимёвий воситалар ва электрон тарози ашёвий далил сифатида олинган. 

Бошқа ҳолатда эса, “Самарқанд-Хоразм” йўналишида ҳаракатланаётган Cobalt русумли автомашина Тупроққалъа тумани ҳудудида ДХХ ва ИИБ ходимлари томонидан тўхтатилиб, текширилган. Натижада унда йўловчи сифатида кетаётган, Ургут туманида яшовчи 2003 йилда туғилган шахсга тегишли 810 гр “опий” моддаси борлиги маълум бўлган. 

Аниқланишича, у қўшни давлатдан контрабанда қилинган ушбу гиёҳвандлик воситасини Хоразм вилоятига сотиш мақсадида олиб кетаётган бўлган. Билдирилишича, ҳозирда унинг жиноий шерикларини аниқлаш бўйича чора кўрилмоқда. 

Ҳар икки ҳолат бўйича қонунбузарларга нисбатан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Жиззах вилоятида 259 туп каннабис ўсимлигини томорқасида парваришлаб, сал кам 15 кг “марихуана” гиёҳвандлик моддасини уйида сақлаб келаётган шахс қўлга олинган эди.