Нигина Ўктамова Париж-2024 йўлланмасини қўлга киритди

Бокс бўйича Ўзбекистон аёллар терма жамоаси аъзоси Нигина Ўктамова Ханчжоуда бўлиб ўтаётган Осиё ўйинлари медалини нақд қилди. Бу ҳақда QALAMPIR.UZ журналисти Шахзод Шукуров хабар берди. 

Шукуровнинг маълум қилишича, бугун, 30 сентябрь куни ўйинларнинг бокс дастурида -54 килограмм вазн тоифасида иштирок этаётган Ўктамова шиддатли руҳда кечган чорак финал жангида япониялик Ринка Киношитадан устун келган. Дастлабки раундни қўлдан бой берган ўзбекистонлик спортчи қолган икки раундни ўз фойдасига ҳал қилган ҳолда мусобақа ярим финалига чиққан. 

Аҳамиятлиси Нигина ушбу ғалабаси орқали жорий йилда Франция пойтахтида бўлиб ўтадиган Париж-2024 Олимпиадаси йўлланмасини ҳам қўлга киритган. 

Шунингдек, бокс бўйича Ўзбекистон терма жамоаси аъзоси Абдумалик Ҳалоков чорак финал масаласини ижобий ҳал қилди. Саралашнинг иккинчи босқичида вьетнамлик Дуонг Нгуен билан жанг қилган Ҳалоков 5:0 ҳисобида ғалаба қозонди. Унинг кейинги босқичдаги рақиби Карло Палам (Филиппин) бўлади.

Маълумот учун, бироздан сўнг -71 килограмм вазн тоифасидаги ўзбекистонлик боксчи Асадхўжа Мўйдинхўжаев Қозоғистон вакили Асланбек Шимбергеновга, +92 килограммда  Баҳодир Жалолов тожикистонлик спортчи Муҳаммад Аброриддиновга қарши рингга кўтарилади.