Нганну менга яхшироқ қаршилик қилади деб ўйлагандим – Жошуа

Британиялик собиқ оғир вазн тоифасидаги жаҳон чемпиони Энтони Жошуа камерунлик собиқ UFC камари соҳиби Франсис Нганну билан якунланган жанг ҳақида фикр билдирди. Жангда рақибини икки марта нокдаунга учратган Жошуа 2-раундда нокаут билан ғалаба қозонди.

“Мен чемпионлик сари йўлда эдим ва бу жангни тезроқ ижобий якунлашим керак эди. Унинг Фьюри билан жангини кўрганимда, “Ҳа, бу йигит мен билан кураша олади”, деб ўйладим. У ажойиб жангчи ва яхшигина натижаси бор, лекин боксда ғолиб битта. Келгусида Нганну боксдаги фаолиятини давом эттира олади”, дейди Жошуа.

Энтони Жошуа билан жанг 2023 йил бошида UFC'ни тарк этган Франсис Нганну учун профессионал боксдаги иккинчи тўқнашув бўлди. Ўтган йили 28 октябрь куни Нганнунинг бокс қоидалари бўйича WBC йўналиши бўйича жаҳон чемпиони британиялик Тайсон Фьюри билан бўлиб ўтган биринчи профессионал жангида имкониятни бой берганди.