Неймар “Сантос” машғулотларида жанжал кўтарди – ОАВ 

Кеча, 3 май куни бразилиялик футбол юлдузи Неймар “Сантос” жамоаси машғулотида жанжал кўтарди. Бу ҳақда “Globo” хабар берди.

Манбага кўра, воқеа кеча, 3 май куни “Сантос”нинг эрталабки машғулоти вақтида содир бўлган. Неймар 18 ёшли ярим ҳимоячи Робиньо Жуниор билан тортишиб қолган. Аввалига у ёш футболчини тўхтатган ва улар ўртасида оғзаки баҳс юзага келган. 

Хабарларга кўра, Неймар ўйин давомида ютқазганидан сўнг жаҳли чиқиб, ундан секинроқ ўйнашни талаб қилган.

Шундан сўнг вазият кескинлашиб, футболчилар ўртасида жанжал юзага келган. Неймар жамоадошини итаргани, ҳатто унинг юзига зарба бергани айтилмоқда.

Маълумотларга кўра, кейинчалик Неймар ёш футболчи билан алоҳида гаплашиб, ҳиссиётга берилгани учун ундан узр сўраган. Можаро бартараф этилгани қайд этилган.

“Сантос” клуби вакиллари ва футболчининг агентлари ушбу ҳолат юзасидан изоҳ бермаган. Неймарнинг яқинлари эса, бу воқеадан бехабар эканликларини билдирган.

Маълумот учун, “Сантос” жамоаси жорий йилнинг 6 май куни Жанубий Америка кубоги гуруҳ босқичи доирасида Парагвайнинг “Реколета” жамоасига қарши майдонга тушади.