Нетаньяхуни Гитлернинг тақдири кутмоқда – Фидан
Олам
−
29 Июль 5714
Исроил Бош вазири Биньямин Нетаньяху ҳам фашистлар етакчиси Адольф Гитлер билан бир хил тақдирга дуч келиши мумкин. Бу ҳақда Туркия Ташқи ишлар вазири Хоқон Фидан ўзининг Х ижтимоий тармоғидаги саҳифасида ёзди.
“Геноцидчи Нетаньяхунинг якуни геноцидчи Гитлернинг охири билан бир хил бўлади. Фаластинликларни йўқ қилишга уринаётганлар ўз қилмишлари учун геноцидчи фашистлар каби жавоб беради. Инсоният фаластинликлар томонида бўлади, сизлар уларни йўқ қила олмайсизлар”, дейилади постда.
Шунингдек, Фидан Президент Ражаб Тойиб Эрдўғаннинг Туркия Ливия ва Қорабоғда бўлгани каби Исроилга ҳам кириши мумкинлиги ҳақидаги баёнотига изоҳ берди. Фиданнинг фикрича, Эрдўған “инсоният виждонининг овозига” айланган.
“Бу овозни бостиришга уринаётган халқаро сионистик доиралар, айниқса, Исроил катта ваҳима ичида. Геноцидни содир этганлар ва уларни қўллаб-қувватлаганларнинг ҳаммаси худди шундай якун топди”, деб ёзади Хоқон Фидан.
Эслатиб ўтамиз, аввалроқ Президент Ражаб Тойиб Эрдўған Туркия Исроилга ҳам кириши мумкинлигини айтганди. Шунингдек, Фаластин раҳбари Маҳмуд Аббос Туркия парламентида нутқ сўзламоқчилигини маълум қилганди.
Азизбек Эшмаматов
Live
Барчаси
