Непалда Telegram блокланди

Непал ҳукумати мамлакатда жиноятлар кўпайгани сабабли Telegram мессенжерига киришни блоклашга қарор қилди. Бу ҳақда “Kathmandu Post” хабар берди.

Мамлакатнинг Электралоқа бошқармаси берган баёнотга кўра, Telegram фирибгарлик ва пул ювиш мақсадларида ишлатилмоқда.

Барча телекоммуникация компанияларига мессенжерга киришни дарҳол чеклаш ёки бутунлай ёпиш топширилган. Бу чора хавфсизлик хизматларининг Telegram орқали амалга оширилаётган ноқонуний фаолиятлар ҳақидаги мурожаатларидан сўнг кўрилган.

Нашрнинг қайд этишича, бу қарор 2023 йилнинг ноябрида TikTok’га нисбатан қабул қилинган ўхшаш чораларни эслатади. Ўша пайтда TikTok жамият тартибини бузувчи контент ва зарарли материаллар тарқалаётгани сабабли блокланган эди. Бироқ кейинчалик ByteDance компанияси Непал қонун-қоидаларига риоя қилишга рози бўлгач, тақиқ олиб ташланган.

Эслатиб ўтамиз, аввалроқ Малайзияда суд Telegram мессенжерининг вақтинча фаолиятини тўхтатиш бўйича қарор чиқарганди. Бунга икки Telegram каналига оид даъво сабаб бўлган.