Навоийда 15 яшар икки бола каналга чўкиб кетди

Навоий вилоятида 2011 йилда туғилган икки бола каналга чўкиб кетиши оқибатида вафот этди. Бу ҳақда QALAMPIR.UZ сўровига жавобан Бош прокуратура матбуот котиби Ҳаёт Шамсутдинов маълум қилди.

Маълум бўлишича, жорий йилнинг 2 июль куни соат тахминан 13:30 да вояга етмаган Б.Р. ҳамда С.А. “Бешработ-Конимех” каналининг “Янги обод” МФЙ Бунёдкор кўчасидан оқиб ўтувчи қисмига синфдошлари билан чўмилиш учун борган ва чўкиб кетиб, вафот этган.

Мазкур ҳолат юзасидан ўтказилган терговга қадар текширув ҳаракатлари давомида жиноятга хос белгилар аниқланмаган.

Суд тиббий экспертизанинг дастлабки маълумотномасига кўра, вояга етмаган Б.Р. ва С.А. нинг ўлимига “юқори нафас йўлларининг сув билан беркилишидан келиб чиққан механик асфиксия” сабаб бўлган бўлиши мумкин.

Шунингдек, олиб борилган терговга қадар текширув давомида “Ҳудудий электр тармоқлари” Навбаҳор туман бўлимининг тегишли мутахассислари жалб қилинган ҳолда фуқаро А.Р. га тегишли, канал ёнидаги деҳқончилик учун мўлжалланган сув насоси ишчи ҳолатда каналга тушириб кўрилганда сувда электр кўрсаткичлари мавжуд эмаслиги аниқланган.

Ҳозирда мазкур ҳолат юзасидан Навбаҳор туман прокуратураси томонидан терговга қадар текширув ҳаракатлари ўтказилмоқда.

Эслатиб ўтамиз, аввалроқ Самарқанд вилоятининг Оқдарё туманида 1984 йилда туғилган фуқаро Қорадарё дарёсида чўкиб кетган эди.