Namanganda chegaradan 9 kg “gashish” olib o‘tgan shaxs ushlandi (video)

Namangan viloyatida Qirg‘iz Respublikasidan aylanma yo‘llar orqali 9 kg 702 gr “gashish” va qiymati 3,2 mlrd so‘mdan ortiq bo‘lgan kuchli ta’sir qiluvchi dori vositalari olib kirgan shaxslar ushlandi. Bu haqda Bu haqda Davlat xavfsizlik xizmati xabar berdi.

Davlat xavfsizlik xizmatining Namangan viloyati bo‘yicha boshqarmasi xodimlari tomonidan Chegara qo‘shinlari, viloyat Ichki ishlar boshqarmasi hamda Bojxona boshqarmasi bilan hamkorlikda tezkor tadbir o‘tkazilgan. Uchqo‘rg‘on tumanida yashovchi 1975 yilda tug‘ilgan shaxs “o‘zbek-qirg‘iz” davlat chegarasining Uychi tumani “Yangiyer” MFY hududidan o‘tuvchi qismi orqali Qirg‘iz Respublikasidan O‘zbekistonga noqonuniy ravishda kirib kelgan vaqtida to‘xtatib qolingan.

Mazkur shaxs tekshirilganida, uning yonida bo‘lgan sumka ichida 9 kg 702 gr “gashish” moddasi borligi aniqlanib, protsessual tartibda rasmiylashtirib olingan.

Hozirda unga nisbatan Jinoyat kodeksining 223-moddasi (Qonunga xilof ravishda chet elga chiqish yoki O‘zbekiston Respublikasiga kirish) 1-qismi va 246-moddasi (Kontrabanda) 2-qismi bilan jinoyat ishi qo‘zg‘atilib, qamoq ehtiyot chorasi qo‘llanildi.

Boshqa holatda esa Namangan shahrida yashovchi 1990 yilda tug‘ilgan fuqaro Qirg‘iz Respublikasidan aylanma yo‘llar orqali Yangiqo‘rg‘on tumani hududiga kontrabanda qilingan, taxminiy qiymati 3,2 mlrd so‘mdan ortiq bo‘lgan 24122 dona “Regapen” va 4880 dona “Tropikamid” kuchli ta’sir qiluvchi dori vositalari hamda 45 turdagi jami 61287 dona kontrafakt dorilarni qabul qilib olib, ketmoqchi bo‘lgan vaqtida qo‘lga olingan.

Shundan so‘ng, ushbu dori vositalarini buyurtma qilgan shaxslar va kurerlarni aniqlash yuzasidan tezkor tadbir davom ettirilgan. Natijada Namangan shahri va Kosonsoy tumanida yashovchi 5 nafar fuqaro aniqlanib, ular haqiqatdan ham kuchli ta’sir qiluvchi dori vositalari va kontrafakt dorilarni Toshkent shahri hamda Farg‘ona vodiysi viloyatlarida sotish bilan shug‘ullanishlari ma’lum bo‘lgan.

Hozirda mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.

Eslatib o‘tamiz, avvalroq Sirdaryoda narkolaboratoriya tashkil qilgan 3 nafar shaxs ushlangandi.