Наманганда 22 ёшли йигит пластик картадан қарийб 93 млн сўм ўғирлади

Наманган вилояти Янги Наманган туманида 2003 йилда туғилган шахс 1983 йилда туғилган фуқаронинг картасидан 92 млн 992 минг сўм ўғирлади. Бу ҳақда вилоят Ички ишлар бошқармаси хабар берди.

Қайд этилишича, жорий йилнинг 7 май куни Наманган вилояти ИИБ Кибер хавфсизлик бўлими ва Янги Наманган тумани ИИБ ходимлари томонидан олиб борилган тезкор-қидирув ишлари ўтказилган. Унда шу йилнинг 10 февраль куни Янги Наманган тумани “Оромгоҳ” маҳалласида яшовчи 1983 йилда туғилган фуқаро Д.М. нинг пластик картасидан 92 млн 992 минг сўм пулни ечиб олган шахс Фарғона вилояти Фарғона шаҳар “Мирзо Улуғбек” маҳалласида яшовчи 2003 йилда туғилган фуқаро М.М. экани аниқланган.

Эслатиб ўтамиз, аввалроқ Тошкент шаҳар Мирзо Улуғбек туманида сохта колл марказ ташкил қилиб, 15 мингдан ортиқ кишининг маълумотини йиғган жиноий гуруҳ ушланганди. Ушбу жиноий гуруҳда 2 нафар ташкилотчи ва 20 га яқин оператор фаолият юритган. Гумонланувчилардан 15 мингдан ортиқ абонентнинг рақамлари, шахсга доир маълумотлари, гиёҳвандлик моддалари, 35 дона алоқа воситаси, 10 дан ортиқ пластик карталар ашёвий далил сифатида олинган.