Надаль, Медведев, Циципас... “Катта Дубулға” турнирининг ярим финалчилари маълум 

Спорт 1593
image

Австралия очиқ чемпионатида иккинчи рақам остида таснифланган россиялик теннисчи Даниил Медведев канадалик Феликс Аже-Альяссимни беш сетда 6:7, 3:6, 7:6, 7:5, 6:4 ҳисобида мағлуб этиб, ярим финалга йўл олди. Қарама-қаршилик 4 соат 42 дақиқа давом этди.

Медведев учрашув давомида 15 марта “эйс” амалга оширди ва 9 та қўш хатога йўл қўйди. Альяссим эса ўз ҳисобига 18 та эйс ва 4 та қўш хатони ёзиб қўйди. 

Ўйин кутилганидек, муросасиз кечди. Турнирнинг асосий фаворитларидан бири ҳисобланган Медведев дастлабки икки сетда имкониятни бой берган бўлса-да, қолган сетлар ўз фойдасига ҳал қилди ва финал йўлланмаси учун Греция вакили Стефанос Циципасга қарши кортга чиқадиган бўлди. Иккинчи ярим финалда эса испаниялик Рафаэль Надаль ва италиялик Маттео Берреттини ўзаро баҳс олиб боради.

Эслатиб ўтамиз, Австралия очиқ чемпионатининг амалдаги ғолиби дунёнинг биринчи рақамли теннисчиси Новак Жокович ҳисобланади. У ўтган йилги финалда айнан Медведевни 7:5, 6:2, 6:2 ҳисобида мағлуб этган эди.

Маълумот учун, “Катта Дубулға” туркумига кирувчи турнир ғолиби 2000 рейтинг очкоси ва 2,2 миллион АҚШ доллари миқдоридаги пул мукофотига эга бўлади.
 

Ҳумоюн Орипов
Мақолага баҳо беринг
Баҳолаганлар: 18
Рейтинг: 2.6
t
×