Нью-Йоркдаги синагога остида яширин туннель топилди (видео)

Кеча, 9 январь куни Нью-Йорк полиция департаменти Бруклиндаги яҳудийликни тарғиб қилувчи Чабад-Лубавитч ҳаракати бош қароргоҳи остида ноқонуний қурилган туннелни топди. Бу ҳақда маҳаллий "Crown Heights Info" сайти хабар берди.

Унга кўра, Нью-Йорк полиция департаменти Чабад-Лубавитч Жаҳон штаб-квартираси остида ноқонуний қурилган туннелни аниқлади. Воқеа ортидан Нью-Йоркдаги тарихий ибодатхонада келиб чиққан тўқнашувларда 10 дан ортиқ Ҳасидик яҳудий диндорлари ҳибсга олинган.

Маҳаллий равишда “The 770" номи билан танилган, асосан яҳудийлар яшайдиган Crown Heights маҳалласидаги 770 Шарқий Парк йўли манзилидан кейин бу бино дунёдаги энг йирик яҳудий ташкилотларидан бири бўлган Чабад ҳаракатининг бош қароргоҳи ҳисобланади.

Ижтимоий тармоқларда тарқалган видеоларда синагога аъзоларининг туннелдан чиқиб кетаётгани, полицияга қаршилик кўрсатиши ортидан келиб чиққан жанжал акс этган.

Маълум қилинишича, у ердан матраслар ҳам топилган. Полиция ноқонуний ва махфий қурилган туннель бўйича тергов бошлаган.

Чабад-Лубавич штаб-квартирасининг матбуот котиби Мотти Селигсон аввалроқ бир гуруҳ экстремист талабалар ибодатхонага рухсатсиз кириш учун қўшни бинолардаги бир нечта деворларни бузиб ўтишганини айтмоқда. 

Эслатиб ўтамиз, 2023 йил декабрь ойида Исроил Ғазо марказида ҲАМАС етакчиларининг туннелларини топганди.