МЮнинг мағлубиятсиз серияси 6 та ўйинга етди

Кеча, 23 февраль куни Англия Премьер-лигасининг 27-тури доирасида “Манчестер Юнайтед” жамоаси “Эвертон”ни кичик ҳисобда мағлубиятга учратди. Шу орқали манчестерликларнинг бош мураббий вазифасини вақтинча бажарувчи Майкл Кэррик қўл остида мағлубиятсиз серияси олти ўйинга етди.  

Англия Премьер-лигасининг 27-туридан ўрин олган сўнги учрашувда “Манчестер Юнайтед” сафарда “Эвертон”ни 1:0 ҳисобида мағлуб этди. Учрашувдаги ягона голни Бенжамин Шешко 71-дақиқада киритди.

Мазкур ғалабадан сўнг “қизил иблислар” 48 очко билан турнир жадвалида тўртинчи ўринда бормоқда. Шу тариқа, “қизил иблислар” 6 та ўйинда 5 та ғалаба ва 1 та дуранг қайд этиб, барқарор натижа кўрсатмоқда.

Жамоа навбатдаги баҳсни жорий йилнинг 1 март куни ўз майдонида “Кристал Пэлас”га қарши ўтказади.

Эслатиб ўтамиз, Кэррик 2026 йил январь ойида Рубен Аморим мураббийлик лавозимини тарк этганидан сўнг жамоанинг вақтинчалик бош мураббийига айланганди.