Музетти “Ролан Гаррос”да қатнашмайдиган бўлди

Дунёнинг 10-рақамли теннисчиси, италиялик Лоренцо Музетти жароҳати сабаб “Ролан Гаррос” (Франция очиқ чемпионати)да иштирок этолмайди. Бу ҳақда спортчи ўзининг Instagram саҳифасида маълум қилди.

Лоренцо Музетти жорий йилнинг 12 май куни Рим Мастерс турнирининг 1/8 финалида Каспер Руудга 3/6, 1/6 ҳисобида мағлуб бўлди. Мусобақадан сўнг ўтказилган тиббий текширувлар италиялик спортчида сон мушаги — ректус феморис (соннинг тўғри мушаги) жароҳатини аниқлади.

Шу сабаб Музетти бир неча ҳафта давомида тикланиш жараёнини ўтайди ва нафақат “Ролан Гаррос”, балки Германиянинг Гамбург шаҳрида ўтадиган ATP 500 турнирини ҳам ўтказиб юборади.

“Кеча ўйиндан кейин тиббий текширувлардан ўтдим ва натижада ректус феморис жароҳати аниқланди. Бу бир неча ҳафта дам олиш ва тикланишни талаб қилади. Афсуски, бу мен учун катта зарба бўлди, чунки Гамбург ҳамда “Ролан Гаррос” турнирларида қатнаша олмайман”, деб ёзди Музетти ўзининг Instagram саҳифасида.

Шунингдек, италиялик теннисчи Римдаги мухлисларга миннатдорлик билдириб, уй турнирида ўзини тўлиқ соғлом ҳис қилмаганига қарамай, кортга чиқишга ҳаракат қилганини таъкидлади.

Маълумот учун, 24 ёшли Музетти ATP турнирларининг икки карра ғолиби ҳисобланади. У, шунингдек, 2024 йилги Париж ёзги Олимпиада ўйинларининг бронза медали совриндори ҳамдир.