Муҳаммад Салоҳ ҳам Саудия клубига кўчиб ўтиши кутилмоқда – манба 

Англиянинг “Ливерпуль” клуби футболчиси Муҳаммад Салоҳ фаолиятини Саудия Арабистонининг “Ал-Иттиҳод”  жамоасида давом эттириши кутилмоқда. Бу ҳақда саудиялик журналист Муҳаммад Нур маълум қилди.

Унгa кўра, “мерсисайдликлар”нинг мисрлик юлдузи Муҳаммад Салоҳнинг Саудия клуби билан шартнома имзолаш эҳтимоли жуда юқори ва айни дамда бу борадаги музокаралар ижобий якунга яқин турибди. 

“Салоҳ трансфери амалга ошадими? Бу трансфернинг амалга ошиши эҳтимолини 75 фоизга баҳолаган бўлардим”, дейди Муҳаммад Нур. 

Айтиш жоиз, аввалроқ “Ливерпуль” бош мураббийи Юрген Клопп футболчиларига Саудиядан тушаётган таклифларни эшитиб, уларни ушлаб қолиш имконсизлигини билдирганди.

“Al-Riyadiah”нинг хабар беришича, “Ал-Иттиҳод” Салоҳга икки йиллик шартнома таклиф қилмоқда ва клуб форвард учун бу муддат давомида 180 миллион евро маош тўлашга тайёр.

Эслатиб ўтамиз, аввалроқ Саудия Арабистонининг “Ал-Иттифоқ” клуби бош мураббийи Стивен Жеррард “Ливерпуль” ҳужумчиси Муҳаммад Салоҳни ўзининг севимли футболчиси эканлигини айтди ва уни жамоасига қўшиб олмасликка ваъда берган эди.