Молдова давлат тили номини румин тилига ўзгартиради

Молдова парламенти мамлакатнинг Конституция матнида, барча қонунлар ва қонуности ҳужжатларида “молдован тили” сўзини “румин тили” сўзига расмий равишда ўзгартиришни маъқуллади. Бу ҳақда Молдова парламенти Матбуот хизмати хабар берди. 

Қайд этилишича, кеча, 16 март куни ҳукмрон “Ҳаракат ва бирдамлик” партияси ташаббуси ҳисобланган “Давлат тилини ўзгартириш тўғрисида”ги Қонун лойиҳаси бўйича овоз бериш бўлиб ўтган. У иккинчи ва якуний ўқишда қабул қилинган. Парламентнинг 101 нафар депутатидан 58 нафари  лойиҳани ёқлаб овоз берган.

Ўзгартиришга кўра, барча қонун ҳужжатларидаги “молдаван тили” ибораси “румин тили” билан алмаштирилади. Худди шу нарса “давлат”, “расмий” ва “она тили” сўзларига ҳам тегишли ҳисобланади. Эскирган деб эълон қилинган “Лотин ёзуви асосида қўлланилувчи” матн Конституциядан чиқариб ташланади.

Маълумот учун, Молдова Мустақиллик Декларациясида румин тили давлат тили сифатида белгиланган. Шунга асосланиб, 2013 йилда Конституциявий суд буни расмий равишда шундай бўлиши керак, деб ҳисоблаган. Конституцияга кўра, лотин алифбосига асосланган ва румин тили билан бир хил молдаван тили мамлакатда давлат тили ҳисобланади. Шу билан бирга, республика мактаб ва университетларида румин тили ўқитилса, тан олинмаган Днестрбўйида кирилл алифбосига асосланган молдаван тили амалда.

Молдаван ва румин тиллари роман тилларининг Болқон-роман кичик гуруҳига киради ва улар ўзаро ўхшашдир. Баъзи тилшунослар “молдаван” ва “румин” тилларини бир тилнинг турли номлари деб ҳисобласа, айримлар молдаван тилини мустақил Шарқий роман тили деб атайди.