Мирзиёев Си Цзиньпин билан учрашди

Бугун, 18 май куни ХХР Раиси Си Цзиньпин Ўзбекистон Президенти Шавкат Мирзиёев билан Хитой шимоли-ғарбидаги Сиань шаҳрида музокаралар ўтказди. Бу ҳақда “China Daily” хабар берди.

Айтилишича, Си Цзиньпин Мирзиёевни Хитой-Марказий Осиё саммити ва Хитойга давлат ташрифи билан қутлаган. Шунингдек, у ўтган йилнинг сентябрь ойида Ўзбекистонга давлат ташрифи ва Мирзиёевнинг меҳмондўстлигини эслаган.

Бундан ташқари, Си Цзиньпин Ўзбекистон Президентини яқинда мамлакатда бўлган референдум муваффақиятли ўтгани ва ўзбек халқининг Мирзиёевга бўлган чуқур ишончи ҳамда самимий қўллаб-қувватлашини тўлиқ намоён этган янги Конституция қабул қилингани билан табриклаган.

“Сизнинг раҳнамолигингизда Ўзбекистонда амалга оширилаётган ислоҳот ва очиқлик янада кенг истиқболга эга бўлиб, “Янги Ўзбекистон” тараққиёти янада юксак самаралар беришига ишонамиз”, деган Си Цзиньпин.

Шунингдек, ХХР Раиси ўтган йилнинг сентябрь ойида икки томонлама умумий келажакка эга бўлган ҳамжамият қарашларини амалга ошириш ва икки томонлама муносабатларнинг янги тавсифини биргаликда эълон қилганини таъкидлаган. У Хитой Ўзбекистон билан ҳамкорликни чуқурлаштириш ва умумий келажакка эга Хитой-Ўзбекистон ҳамжамиятини барпо этиш учун ҳамкорлик қилишга тайёрлигини билдирган.