Мирзиёев бугун FIFA президенти билан учрашади

Бугун, 20 сентябрь куни Ўзбекистон Президент Шавкат Мирзиёев FIFA раҳбари Жанни Инфантино билан учрашади. Бу ҳақда Президент матбуот хизмати хабар берди. 

Қайд этилишича, амалий ташриф билан Нью-Йорк шаҳрида бўлиб турган Ўзбекистон етакчисининг бугун, 20 сентябрь куни ҳам бир қатор икки томонлама учрашувлар ўтказиши режалаштирилган.

Жумладан, Покистон Бош вазири вазифасини бажарувчи Анвар Какар, Жаҳон банки президенти Ажай Банга, FIFA раҳбари Жанни Инфантино, “Citygroup” корпорацияси раиси Жон Дуган, BSG компанияси раиси Рич Лессер билан учрашув ўтказади.

Эслатиб ўтамиз, кеча, 19 сентябрь куни Марказий Осиё мамлакатлари ва Америка Қўшма Штатлари етакчиларининг “C5+1” форматидаги биринчи саммити бўлиб ўтганди. Унда АҚШ, Қозоғистон, Қирғизистон, Тожикистон, Туркманистон ва Ўзбекистон Президентлари қатнашганди. Саммитдан сўнг “Forbes” нашри АҚШ Президенти Жо Байденнинг янги геостратегик ташаббусида Ўзбекистон Президенти Шавкат Мирзиёев муҳим роль ўйнашини ёзган.

Агар Жо Байден Марказий Осиёга ташриф буюрса, манзил катта эҳтимол билан ё Ўзбекистон ёки Қозоғистон бўлиши мумкин. Чунки жорий йилнинг 28 февраль – 1 март кунлари АҚШ Давлат котиби Энтони Блинкен ўз фаолияти давомида биринчи марта Қозоғистон ва Ўзбекистонга ташриф буюрди, Президент Қосим-Жомарт Тўқаев ва Шавкат Мирзиёев қабулида бўлиб, қатор масалаларни муҳокама қилди. Шунингдек, у Президент Жо Байденнинг месежларини етказди.