Миллий сертификат имтиҳони янги алифбода ўтказиладими?

Жорий йилнинг 24–26 октябрь кунлари она тили ва адабиёт фанидан миллий сертификат имтиҳонлари амалдаги лотин ёзувига асосланган ўзбек алифбосида ўтказилади. Бу ҳақда Билим ва малакаларни баҳолаш агентлиги маълум қилди.

Қайд этилишича, имтиҳон учун тест материаллари амалдаги ўзбек алифбосида тайёрланган. Очиқ турдаги тест топшириқларининг жавоблари ҳамда ёзма ишлар, яъни эсселар ҳам шу алифбода ёзилиши керак.

Агентлик янги алифбони жорий этиш тўғрисидаги қонунга кўра, янги алифбо олти ойдан сўнг кучга киришини эслатган. Шу сабабли ҳозирча агентлик томонидан ўтказиладиган имтиҳонларда янги алифбодан эмас, амалдаги алифбодан фойдаланилади.

Эслатиб ўтамиз, жорий йилнинг сентябрь ойида бўлиб ўтган Сенатнинг 19-ялпи мажлисида “Лотин ёзувига асосланган ўзбек алифбосини жорий этиш тўғрисида”ги Ўзбекистон Республикаси Қонунига ўзгартириш киритиш ҳақида”ги қонун сенаторлар томонидан маъқулланганди. Жорий йилнинг 21 октябрь куни эса Президент Шавкат Мирзиёев лотин ёзувига асосланган ўзбек алифбосини такомиллаштиришга қаратилган қонунни имзолаган эди.