Месси Роналдунинг Instagram'даги рекордини янгилади

Аргентиналик футболчи Лионель Мессининг Жаҳон кубоги билан тушган суратига Instagram'да 43 миллиондан ортиқ "ёқди" тугмаси босилди, бу натижа спортчилар орасида рекорд ҳисобланади. Бу ҳақда 19 декабрь куни Италиянинг "Tuttosport" нашри хабар берди.

Аргентина Қатарда бўлиб ўтган Жаҳон чемпионати финалида Францияни мағлуб этди. Учрашувнинг асосий вақти 2:2, қўшимча вақт 3:3 ҳисобида якунланган бўлса, пеналтилар сериясида аргентиналиклар 4:2 ҳисобида зафар қучди. Месси финалда иккита гол урди ва турнирнинг энг яхши футболчиси деб топилди.

"Жаҳон чемпионлари! Мен буни орзу қилардим. Оиламга, мени қўллаб-қувватлаган барчага, шунингдек, бизга ишонганларга катта раҳмат", деб ёзди Месси. 

Месси португалиялик ҳужумчи Криштиану Роналдунинг рекордини янгилади. Гап шундаки, Роналду ноябрь ойида Месси билан "Louis Vuitton" чамадонида шахмат ўйнаётган суратини Instagram'га жойлаганди. Роналдунинг ўша пости 41,9 миллиондан ортиқ "лайк" тўплаган.