Месси фаолиятини “Интер Майами”да тугатмоқчи

Аргентиналик футбол юлдузи Лионель Месси ва Американинг “Интер Майами” клуби янги кўп йиллик шартнома бўйича якуний келишув арафасида турибди. Фақат айрим тафсилотларни келишиб олиш қолган. Музокаралар якуний босқичга кирган ва келишув тез орада амалга оширилиши кутилмоқда. Бу ҳақда ESPN хабар берди.

Узоқ муддатли шартнома 38 ёшли футболчининг 2026 йилда АҚШ, Канада ва Мексика мезбонлик қиладиган жаҳон чемпионати пайтигача Америкада қолишини ва катта эҳтимол билан фаолиятини шу жамоада якунлашини билдиради.

Манбага кўра, Месси ва “Интер Майами” ўртасида шартнома келишилгач, ҳужжат якуний тасдиқлаш учун МЛС раҳбариятига юборилади. Аргентиналик юлдуз бошқа лигаларга ўтиши мумкинлиги ҳақидаги хабарларга қарамай, Месси ва Маями клуби муносабатларини майдонда ва ундан ташқарида ҳам давом эттиришдан манфаатдор эканини билдирган.

“Мессининг Жанубий Флоридада ўзини қулай ҳис этиши ва фаолиятини шу ерда якунлаши учун биз қўлимиздан келган барча ишни қиламиз”, дейди “Интер Майами” раҳбарларидан бири Хорхе Мас.

Месси 2023 йил 15 июлда “Интер Майами” билан дастлабки 2,5 йиллик шартномани имзолаган эди. У дебют мавсумидаёқ жамоа билан 2023 йилги Лигалар Кубоги ғолиблигини қўлга киритди. Шунингдек, у келганидан кейин “Интер Майами” бир мавсумда энг кўп очко тўплаш бўйича лига рекордини ўрнатди.

Маълумот учун, 2025 йилда Месси “Интер Майами” сафида 36 та ўйин ўтказиб, барча мусобақаларда (Конкакаф Чемпионлар Кубоги, Клублар ўртасидаги Жаҳон чемпионати, МЛС ва Лигалар Кубоги) жами 28 та гол урди ва 14 та голли узатма амалга оширди. Ҳозирда у жамоанинг энг яхши тўпурари ҳисобланади.

Эслатиб ўтамиз, жорий йил 4 сентябрь куни Аргентинанинг “Estadio Mâs Monumental” стадионида бўлиб ўтган баҳсда Аргентина Венесуэла устидан 3:0 ҳисобида ғалаба қозонди. Унда Лионель Месси Аргентина терма жамоасидаги сўнгги ўйинини ўтказди ва дубль қайд этиб, учрашувнинг энг яхши футболчиси сифатида майдондан чиқди.