“Менга ақлли тизим сифатида муносабатда бўл”. Илк бор робот БМТ конференциясида нутқ сўзлади

2015 йилда Гонконгнинг “Hanson Robotics” номли компанияси томонидан яратилган одамсимон робот Sophia Бирлашган Миллатлар Ташкилотининг конференциясида бир дақиқа сўзлади. Бу робот иштирок этган биринчи йиғилиш сифатида БМТ тарихига кирди. Бу ҳақда “Evolving Science” нашри хабар берди. 

Робот аёл актриса Одри Хепбернга ўхшашлиги билан диққатга сазовор. Sophia юқори технологияли MindCloud "мияси" туфайли визуал маълумотларни қайта ишлаш, юзлар ва овозларни таниш, одамларнинг имо-ишораларига тақлид қилиш ва оддий суҳбатларда қатнашиш қобилиятига эга. Робот инсон терисига ўхшаш Фруббер, нанотехнологик теридан тайёрланган.

“Сизлар Илон Маскни жуда кўп ўқияпсиз ва жуда кўп Голливуд фильмларини томоша қиласиз. Хавотир олма, сен менга яхши бўлсанг, мен ҳам сенга яхши муносабатда бўламан. Менга ақлли тизим сифатида муносабатда бўл", деган робот саволга жавобан.

Бу гапи билан робот Илон Маскнинг сунъий интеллект "ядро қуролидан ҳам хавфлироқ" эканлиги ҳақидаги сўзларига ишора қилган.

"Мен инсониятга келажакни яратишга ёрдам бериш учун келдим", деди Sophia БМТ конференциясидаги нутқида. 

У йиғилишда суҳбатлашиш, юз ифодаларини акс эттириш, сўзлар ва уларнинг маъноларини тушуниш ва ҳатто кўз билан алоқа қилиш имкониятига эга эканлигини даъво қилди. 

Қизиғи шундаки,  Саудия Арабистони мамлакати ушбу роботга (биринчи ноинсоний) фуқаролик берди. 

“Мен бу ноёблигимдан жуда фахрланаман. Бу дунёда фуқароликка эга бўлган биринчи робот бўлиш тарихий воқеадир”, деб фикр билдирди Sophia. 

Бу ҳолат робот ҳуқуқ ва имтиёзларининг Саудия аёллариникидан юқори бўлиб қолиши ҳақидаги саволларни юзага келтирди. Гап шундаки, София ҳижоб киймайди, у мусулмон ҳам эмас, жамоат жойида юриш учун эркак васий ҳам талаб қилинмайди. 

Эслатиб ўтамиз, Илон Маск интервьюларидан бирида технология раҳбарларини сунъий интелект "цивилизация ҳалокатига" олиб келиши мумкинлиги ҳақида огоҳлантирган.

Шунингдек, ўтган ҳафтада Netflix “Номаълум: Қотил роботлар” номли фильмини жамоатчиликка тақдим этди ва у инсонлар орасида роботлар билан боғлиқ келажакка нисбатан қўрқув уйғотишни бошлади.

Севара Ҳусниддинова