Мексикада машҳур наркобарон ўлдирилиши ортидан катта тартибсизликлар бошланди (видео)

Аввалроқ, Мексика Қуролли кучлари махсус операция давомида мамлакатдаги энг йирик наркокартеллардан бирининг етакчиси, “Эль Менчо” номи билан танилган Немесио Осегера Сервантесни йўқ қилгани ҳақида хабар берилганди. Унинг ўлдирилиши ортидан мамлакат улкан тартибсизликлар ичида қолди. Бу ҳақда “Milenio” хабар берди. 

У кўп йиллар давомида “Халиско янги авлоди” картелига раҳбарлик қилган ва мамлакатдаги энг шафқатсиз жиноятчилардан бири сифатида танилган. “The New York Times” нашрининг ёзишича, у давлат хавфсизлик кучлари билан очиқ тўқнашувлардан чўчимаган. Картель асосан кокаин, метамфетамин ва фентанилни АҚШга етказиб бериш билан шуғулланган.

Штат губернатори Пабло Лемус Наварро ижтимоий тармоқларда картель аъзолари билан Қуролли кучлар ўртасида тўқнашувлар бўлганини тасдиқлаган. Унинг айтишича, хавфсизлик кучлари пайдо бўлгач, картелга алоқадор шахслар операцияга тўсқинлик қилиш мақсадида автомобилларни ёқиб юборган ва йўлларни тўсиб қўйган.

“Эль Менчо”нинг ўлими бутун Мексика бўйлаб тартибсизликларга сабаб бўлган. Нашр маълумотига кўра, камида беш штатда, жумладан Халискода ҳам оммавий тартибсизликлар юзага келган. Маҳаллий аҳоли ва расмийлар автомобиллар ёқиб юборилгани ва кўчалар тўсиб қўйилганини билдирган – бу наркокартеллар томонидан тез-тез қўлланиладиган усул ҳисобланади.

Халиско штатида фавқулодда ҳолат режими жорий этилган. Айрим ҳудудларда жамоат транспорти фаолияти тўхтатилган, аҳолига эса биноларни тарк этмаслик тавсия қилинган. Ёнғинлар штат пойтахти – Гвадалахарада ҳам кузатилган. 

Пуэрто-Вальярта ва Гвадалахара аэропортлари вақтинча рейсларни қабул қилмаяпти. Ижтимоий тармоқларда аэропорт биноларида паноҳ излаётган йўловчилар акс этган видеолар тарқалмоқда.

Тартибсизликлар фонида АҚШнинг Мексикадаги элчихонаси Халиско, Тамаулипас, Мичоакан, Герреро ва Нуево-Леон штатларида бўлган Америка фуқароларига хавфсиз жойда қолиш ва ташқарига чиқмасликни тавсия қилган.