Мексикада дунёнинг энг машҳур наркобарони ўлдирилди (видео)

Мексика армияси “Халиско янги авлоди” картели раҳбари Немесио Осегера Сервантесни (лақаби “Эль Менчо”) йўқ қилди. Бу ҳақда “Associated Pres” хабар берди.

Бу воқеа Мексикадаги энг кучли картелга катта зарба деб баҳоланмоқда. Шунингдек, бу ҳукуматнинг наркосавдога қарши курашдаги йирик ютуғи сифатида кўрилмоқда. Мексиканинг Вашингтондаги элчихонаси операция ҳақида қўшимча маълумотни АҚШ тақдим этганини билдирган.

Операция Мексиканинг ғарбидаги Халиско штатида ўтган. Шу ҳудуд картелнинг асосий базаси ҳисобланади. Картель АҚШга фентанил ва кокаин етказиб бериш билан шуғулланган.

Операциядан кейин ҳудудда оммавий тартибсизликлар бошланган. Йўллар тўсилган, машиналар ёқиб юборилган. Ижтимоий тармоқларда Халискодаги туристик шаҳар Пуэрто-Вальярта осмонида тутун кўтарилаётгани акс этган видеолар тарқалган. Шунингдек, штат пойтахти Гвадалахара аэропортида одамлар саросима билан қочаётгани тасвирланган лавҳалар ҳам чиққан.

Аввалроқ, АҚШ Давлат департаменти Эль Менчони қўлга олишга ёрдам берувчи маълумот учун 15 миллион АҚШ долларигача мукофот эълон қилган эди. АҚШ Адлия вазирлиги маълумотларига кўра, 2009 йилда тузилган ушбу картель Мексикадаги энг шафқатсиз жиноий тузилмалардан бирига айланган.