Медведев Европа давлатларига “Орешник” билан таҳдид қилди (видео)

Россиянинг собиқ президенти ва ҳозирда Хавфсизлик Кенгаши раисининг ўринбосари бўлган Дмитрий Медведев Европа давлатларига “Орешник” ракетаси билан таҳдид қилди. Бу ҳақда у ўзининг X саҳифасида ёзиб қолдирди.  

Медведев ўз саҳифасига “Орешник” баллистик ракетасининг учирилгани акс этган видеони жойлаган ва тинчлик келишуви амалга оширилгач, Украина ҳудудига қўшин юборишга тайёр бўлган Европа давлатларига ушбу қурол билан таҳдид қилган. У Москванинг узоқ вақтдан бери туриб келаётган позициясини яна бир такрорлаган. 

“Европадаги ҳукмрон аҳмоқлар барибир Европада урушни хоҳлашади. Бу минг марта айтилган: Россия Украина ҳудудида биронта ҳам Европа ёки НАТО қўшинлари бўлишини хоҳламайди, лекин йўқ, Микрон (Франция Президенти Эмманюэль Макрон) бу аҳмоқона гапларни давом эттирмоқда. Хўш, унда мана шу нарсани оласизлар”, деган у. 

Шунингдек, Медведев ўз постига Львов шаҳрига “Орешник” ракетаси зарбаси акс этган кузатув камераси кадрларини ҳам қўшиб қўйган.

Эслатиб ўтамиз, кеча, 9 январь куни Россия Қуролли кучлари Украинанинг Львов шаҳрига “Орешник” ракетаси ёрдамида кучли зарба берганди. Бу ҳаракат 2025 йил 29 декабрдаги Россия Президенти Владимир Путиннинг Новгород вилоятидаги қароргоҳига уюштирилган ҳужумга жавобан амалга оширилган.