Мбаппе ПСЖнинг расмий сайтидан “қувғин” қилинди

Франциялик ҳужумчи Килиан Мбаппенинг сурати ПСЖ клубининг расмий сайти муқовасидан олиб ташланди. Ҳозирда сайтнинг янги постерида Неймар, Марко Вератти, Маркинёс, Люка Эрнандес ва Ли Кан Инни кўриш мумкин. 

Аввал хабар берганимиздек, ПСЖ агар 24 ёшли франциялик шу ёзда жамоани тарк этмаса, демак, у янги мавсумда майдонга тушмаслигини маълум қилган эди. Клуб футболчи олдига иккита вариант қўйган: у жамоадан кетиши ёки шартномани узайтириши керак.

Гап шундаки, Мбаппе ПСЖ билан 2024/2025 йилги мавсум учун шартномани автоматик равишда узайтириш вариантини фаоллаштирмаяпти.  Франция клуби эса ҳужумчи учун энг асосий даъвогар бўлган “Реал Мадрид” клубига эркин агент сифатида текинга ўтиб кетишидан хавотирда. Шу сабабли, клуб бошлиқлари футболчига нисбатан ультиматум қўйди. Унга кўра, у шу ёзда ПСЖ билан шартномани узайтириши ёки бошқа жамоага ўтиши керак. Франция ўз чемпионини 200 миллион евро ва қўшимча бонуслар эвазига қўйиб юборишга тайёр.

Юқоридаги можаролар фонида Испаниянинг “Реал” жамоаси Мбаппенинг трансфери доирасидаги ҳаракатларини жадаллаштира бошлади. Ҳатто клубга яқин манбалар “қаймоқранглилар” раҳбарияти жамоага ўтишга яқин бўлиб турган ПСЖ ҳужумчиси Килиан Мбаппени Испания чемпионатининг 1-туридан ўрин олган “Атлетик Билбао”га қарши ўйинда дебют қилишини таъминлаш истагида эканини айта бошлади.

Кейинчалик вазиятга мамлакат Президенти Эммануэль Макрон ҳам аралашиб, ҳужумчига шартнома борасида босим ўтказа бошлади. Манбага кўра, Макрон 24 ёшли футболчининг яна бир мавсумни Париж клубида ўтказишини ва 2024 йилги Олимпиадага эътибор қаратишини истамоқда. Айтиш жоизки, ўтган йили ҳам Мбаппе Макроннинг аралашуви туфайли ПСЖ билан шартномасини узайтирганди. Ўшанда кўпчилик футболчининг “Реал”га эркин агент сифатида ўтишини кутган эди.

“Реал” ва ПСЖ ўртасида аросатда бўлиб турган форвард томонга Саудия Арабистонининг “Ал-Ҳилол” клуби ҳам жиддий нарх кўтарган ҳолда қадам ташлай бошлади. Саудия клуби парижликларга футболчи трансфери учун 300 миллион евро таклиф қилди. Қайд этиш жоиз, футбол тарихида 300 миллион евролик трансфер ҳали бўлмаган. Бироқ араблар “қайсар француз”ни пул билан кўндира олмади. Бунинг ортидан эса тарихдаги энг йирик қийматдаги трансфер амалга ошмайдиган бўлди.