Маск X белгисидан воз кечиш билан бирга жарима ҳам тўлайди

Илгари Twitter номи билан танилган Илон Маскнинг Х компанияси бош қароргоҳи томига рухсатсиз милтилловчи Х белгисини ўрнатгани учун Сан-Франциско ҳукумати томонидан жаримага тортилди. Бу ҳақда BBC хабар берди.

28 июль куни компаниянинг ребрендинги доирасида ўрнатилган ушбу белги ҳафта охирига қадар 24 та шикоятга сабаб бўлди.

Шунингдек, Сан-Франциско маъмурлари фирманинг белги учун рухсати йўқлигини аниқлаган. Натижада у душанба куни олиб ташланди.

Расмийларнинг сўзларига кўра, компания қурилиш инспекцияси ва режалаштириш бўлимининг текшируви харажатларини ҳам қоплаши керак.

Офис томидаги Х белгисидан воз кечган компания ҳозирча фақатгина кичик ўзгаришлар билан чегараланишга мажбур бўляпти. Жумладан, платформанинг иш ойнаси ва мобил версияларидаги кўк қуш ўрнини Х белгиси эгаллади.

Эслатиб ўтамиз, Компания Х белгисини жуда ёрқин қилиб ўрнатгани учун бинога яқин жойда яшовчи одамларнинг норозилигига сабаб бўлган.