Марадонанинг 1986 йилги голи кумуш тангада акс эттирилди

Аргентина Марказий банки (BCRA) 2026 йилги футбол бўйича Жаҳон чемпионати арафасида янги кумуш танга чиқарди. Унда 1986 йил Мексикада бўлиб ўтган мундиал чорак финалида Диего Марадонанинг Англияга урган машҳур голи тасвирланган. Бу ҳақда “Besoccer” нашри хабар берди.

BCRA баёнотида ушбу гол “Жаҳон чемпионати тарихидаги энг буюк гол” сифатида эътироф этилади. Танга дизайни Марадонанинг майдон ярмидан югуриб, тўртта инглиз футболчиси ва дарвозабон Питер Шилтонни ортда қолдириб, гол урган ҳолатини тасвирлайди. Ушбу зарба Аргентина терма жамоасини чорак финалда 2:0 ҳисобида олдинга олиб чиққан, кейинчалик эса жамоа турнирни ғалаба билан якунлаган.

BCRA маълумотига кўра, танга 925 пробали кумушдан тайёрланган бўлиб, 27 грамм оғирликда ва 40 миллиметр диаметрда зарб қилинган. Ички бозор учун атиги 2 500 дона чиқарилган, 10 Аргентина песосининг рамзий номинал қийматига эга. Дизайн Марказий банкнинг Стратегик ғазначилик бўлими томонидан яратилган, танга эса Испаниянинг қироллик зарбхонаси La Fá Nacional de Moneda y Timbre томонидан тайёрланган.

Мазкур кумуш танга 2026 йилги FIFA Жаҳон чемпионатига бағишланган халқаро эсдалик тангалар дастурининг бир қисми ҳисобланади.

Маълумот учун, 1986 йилги футбол бўйича жаҳон чемпионати Мексикада 31 майдан 29 июнгача ўтказилган. Турнир финалда Аргентина Ғарбий Германияни 3:2 ҳисобида мағлуб этиб, ўз тарихидаги иккинчи жаҳон чемпионлигини қўлга киритган эди.