Мактабгача ва мактаб таълими вазирининг биринчи ўринбосари тайинланди

Президент қарори билан Шерзод Абдурасулович Каримов Мактабгача ва мактаб таълими вазирининг биринчи ўринбосари лавозимига тайинланди. Бу ҳақда QALAMPIR.UZ манбаси хабар берди.

Шерзод Каримов 2006-2012 йилларда халқ таълими тизимида, 2012-2018 йилларда ўрта махсус, касб-ҳунар таълими тизимида ишлаган. 2018-2024 йилларда Вазирлар Маҳкамаси таълим, ижтимоий ривожланиш масалалари департаменти, котибияти бўлимида етакчи, бош мутахассис, шўъба мудири, котибияти мудирининг ўринбосари лавозимларида фаолият юритган.

У 2024 йил 28 февралдан бугунгача Вазирлар Маҳкамаси “Маҳалла еттилиги”, ёшлар сиёсати ва маънавият масалалари департаменти Ёшлар сиёсати, мактабгача ва мактаб таълими, соғлиқни сақлаш ва маънавият масалалари бўлими бошлиғи лавозимида ишлаб келаётган эди.

Эслатиб ўтамиз, олдинроқ 2021-2024 йиллар давомида Ўзбекистоннинг Франкфурт-Майн шаҳридаги (Германия) бош консули лавозимида ишлаган Олимжон Суюнович Абдуллаев Ўзбекистон Республикаси Ташқи ишлар вазирининг ўринбосари этиб тайинланганди.