17 та олийгоҳ энди Олий таълим вазирлигига бўйсунади

Ўзбекистондаги 17 та олийгоҳ Олий таълим, фан ва инновациялар вазирлиги тизимига ўтказилди. Бу ҳақда Президент кеча, 2 октябрь куни имзолаган “Айрим давлат олий таълим муассасаларининг бошқарув тизимини янада такомиллаштириш чора-тадбирлари тўғрисида” қарорда сўз боради. 

Ҳужжатга кўра, Мактабгача ва мактаб таълими вазирлиги ҳамда Ихтисослаштирилган таълим муассасалари агентлиги тизимидаги 17 та олий таълим муассасаси Олий таълим, фан ва инновациялар вазирлиги тизимига ўтказилди. Амалда бу педагог кадрлар тайёрлаш билан боғлиқ бошқарув тугунларининг битта вазирлик қўлида тўпланишини англатади.

Қарор билан кўчирилган муассасаларнинг 14 таси педагогика йўналишида кадр тайёрлайдиган олийгоҳлардан иборат. Қолган 3 таси Ихтисослаштирилган таълим муассасалари агентлиги тизимида бўлган. Жами 17 та муассаса энди Олий таълим, фан ва инновациялар вазирлиги таркибида фаолият юритади. Ҳужжатда келтирилишича, ўзгариш айрим давлат олий таълим муассасаларининг бошқарув тизимини янада такомиллаштириш мақсадида қилинган. Илгари педагогик таълимга оид олийгоҳлар икки хил идора тизимига бўлиниб кетган эди: бир қисми мактаб таълими вазирлигига, бир қисми агентликка бўйсунарди. Энди улар ягона тизимда бошқарилади.

Ҳужжат билан Ўзбекистон миллий педагогика университети Низомий Ганжавий номидаги Ўзбекистон миллий педагогика университети деб қайта номланган. Шунингдек, Мактабгача ва мактаб таълими вазирлигининг педагог кадрлар тайёрлаш соҳасидаги бир қатор вазифалари Олий таълим, фан ва инновациялар вазирлигига юклатилган.

Улар қуйидагилардан иборат:

• олий маълумотли педагог кадрлар тайёрлаш сиёсатини ягона концептуал ёндашув асосида юритиш;
• педагогик таълим соҳасини ривожлантиришнинг асосий йўналишларини белгилаш;
• педагогик таълимнинг узвийлиги ва узлуксизлигини, ўқув жараёнига илғор педагогик ва ахборот технологияларини жорий этишни таъминлаш;
• педагогика соҳасида илмий-тадқиқот ва инновацион фаолиятни ривожлантириш;
• педагогика бўйича кадр тайёрлайдиган олий таълим муассасалари бошқарувини такомиллаштириб бориш.