Макрон Трампни ЕИ билан савдо урушидан огоҳлантирди

Франция Президенти Эммануэль Макроннинг ишончи комилки, АҚШнинг Европа Иттифоқи товарларига божлар жорий этилиши инфляциянинг ошишига олиб келиши билан Америка иқтисодиётига зарар этказиши мумкин. Бу ҳақда Макрон бугун, 10 февраль куни CNN телеканалига берган интервьюсида сўз очди.

У Вашингтонни Европа Иттифоқи билан савдо урушини бошлаш ўрнига Хитой, Яқин Шарқдаги инқироз ва Украинадаги урушга қарши туришга эътибор қаратишга чақирди.

“Европа сизнинг иттифоқдошингиз ва агар сиз Европа сармоя ва мудофаа ва хавфсизлик масалаларида кўпроқ иштирок этишини истасангиз, тараққиётдан умидвор бўлсангиз, менимча, бу АҚШ манфаатларига тўғри келади, сиз Европа иқтисодиётига божлар билан таҳдид қилиб, зарар етказишни истамайсиз”, деб таъкидлади Франция Президенти.

Қайд этиш жоиз, аввалроқ АҚШ Президенти Дональд Трамп Европа Иттифоқига ҳам божхона тўловлари билан таҳдид қилиб, Европа билан савдо тақчиллигини камайтириш зарурлигини айтиб ўтганди.

north_east

Хитой Трампга ўзининг услубида жавоб қайтарди

Европа Иттифоқи кўзгу жавобига тайёр эканини айтди. Бир кун аввал Трамп барча давлатлар учун истисносиз АҚШга пўлат ва алюминий импортига 25 фоизлик бож жорий этилишини эълон қилди. Унинг биринчи президентлик давридаги худди шундай ҳаракат АҚШ ва Брюссель ўртасида кескин савдо можаросига олиб келган.

Ўшанда Европа Иттифоқи бир қатор Америка товарлари, жумладан, виски, Harley-Davidson мотоцикллари ва Levi Strauss кийим-кечакларига ўзининг махсус божларини жорий қилган.

Эслатиб ўтамиз,  1 февраль куни Дональд Трамп Мексика ва Канададан олиб келинадиган маҳсулотларга 25 фоиз, Хитойдан импорт қилинадиган маҳсулотларга эса 10 фоиз божларни жорий этиш ҳақидаги фармонни имзолаганди. Бироқ 3 февраль куни, тарифлар кучга киришидан бироз олдин, Трамп Мексика Президенти Клаудия Шейнбаум ва Канада Бош вазири Жастин Трюдо билан гаплашганидан сўнг, тарифларни жорий қилишни бир ойга кечиктиришга рози бўлди.