Макрон Мирзиёев шарафига қабул маросими уюштирди (видео)

Кеча, 12 март куни Ўзбекистон Республикаси Президенти Шавкат Мирзиёевнинг Франция Республикасига давлат ташрифи доирасида мамлакат Президенти Эммануэль Макрон Елисей саройида Мирзиёев шарафига давлат қабул маросими уюштирди. Бу ҳақда Президент матбуот хизмати хабар берди.

Қайд этилишича, қабулда икки мамлакат расмий делегациялари, Франция Бош вазири Франсуа Байру бошчилигида Вазирлар Маҳкамаси  аъзолари, таниқли маданият, санъат ва фан арбоблари, ишбилармон доиралар ва жамоатчилик вакиллари иштирок этган.

Шавкат Мирзиёев Эммануэль Макрон ва унинг рафиқаси Брижит Макронга самимий қабул учун миннатдорлик билдириб, бугун бўлиб ўтган музокаралар тарихий аҳамиятга эга эканини, уларнинг натижасида икки мамлакат ўртасидаги муносабатлар стратегик шериклик даражасига кўтарилганини мамнуният билан қайд этган.

Франция етакчиси ўтказилган музокаралар натижаларини ва имзоланган битимларни олқишлаган.

“Бир неча йил ичида биз энергетика, сув ресурсларини бошқариш, коммунал хизматлар, транспорт, барқарор туризм каби муҳим соҳаларда узоқ муддатли ҳамкорлик алоқаларини ўрнатишга эришдик. Бунинг далили сифатида Франция ҳукумати ва Франция тараққиёт агентлиги кўмагида француз компаниялари Ўзбекистонга инвестиция киритаётгани, ҳудудларда қўшилган қиймат ва иш ўринлари яратилаётгани, ёшлар касб ўрганиб, ҳаётда ўз ўрнини топаётганини келтиришим мумкин”, дейди Эммануэль Макрон.

Шунингдек, томонлар халқлар фаровонлиги йўлида Ўзбекистон-Франция ҳамкорлигини янада мустаҳкамлашга қатъий интилишларини билдирди.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев Франция Республикасининг олий мукофоти – Фахрий легион ордени билан тақдирланганди.