Макрон Мирзиёевни Наполеон таъсис этган орден билан мукофотлади

Кеча, 12 март куни Франция Республикасига давлат ташрифи доирасида Ўзбекистон Республикаси Президенти Шавкат Мирзиёев Франция Республикасининг олий мукофоти – Фахрий легион ордени билан тақдирланди. Бу ҳақда Президент матбуот хизмати хабар берди.

Қайд этилишича, мукофотни Мирзиёевга Франция Президенти Эммануэль Макрон тантанали равишда топширган. Ўзбекистон Президенти икки мамлакат ҳамкорлигини ривожлантириш, халқлар ўртасидаги дўстлик ва ўзаро англашувни мустаҳкамлашга қўшган улкан ҳиссаси учун ушбу орденга сазовор бўлган.

Шавкат Мирзиёев мукофот учун Франция раҳбарига самимий миннатдорлик билдириб, кейинги йилларда сермаҳсул ҳамкорликда юксак натижаларга эришилгани, икки мамлакат муносабатлари стратегик шериклик даражасига кўтарилганини мамнуният билан қайд этган.

Маълумот учун, Фахрий легион ордени 1802 йилда Наполеон Бонапарт томонидан таъсис этилган. Францияда ушбу орден алоҳида хизматларнинг давлат даражасида эътироф этилиши ва шон-шарафнинг энг юқори белгиси ҳисобланади. Шу кунгача Россия Президенти Путин, Германиянинг собиқ федерал канцлери Ангела Меркель, Украина Президенти Владимир Зеленский кабилар шу орден билан мукофотланган.

Эслатиб ўтамиз,аввалроқ Ўзбекистон Республикаси Президенти Шавкат Мирзиёев ва Франция Республикаси Президенти Эммануэль Макрон Стратегик шериклик ўрнатиш тўғрисидаги қўшма декларацияни қабул қилганди.