Макрон Меркелни Наполеон таъсис этган мукофот билан тақдирлади

Германия канцлери Ангела Меркель кеча, 3 ноябрь куни Президент Эммануэль Макроннинг таклифига биноан Францияга ташриф буюрди. Бу канцлернинг ушбу давлатга сўнгги расмий ташрифи бўлиб, уни мамлакат шарқидаги Бон шаҳри аҳолиси қизғин кутиб олди.  

Таъкидланишича, Меркелни кутиб олишга юзлаб киши чиққан. 2005 йилдан бери Германия ҳукуматини бошқариб келаётган Меркель сўнгги 16 йил давомида тўрт нафар Франция Президентининг суҳбатдоши бўлган. 

Учрашувда канцлерга унинг турмуш ўртоғи Иоахим Зауэр ҳамроҳлик қилган, Франция Президенти ҳам меҳмонларни рафиқаси Брижит билан кутиб олган. 

Франция ОАВ икки давлат раҳбарлари ўртасидаги муносабатларнинг илиқлигини қайд этган. Франция Президенти жорий йилнинг июнь ойида коронавирус пандемияси сабабли киритилган асосий чекловлар бекор қилинганидан кейин Германия пойтахтига таклиф қилинган биринчи хорижий давлат раҳбари бўлган. Меркель эса сентябрь ойида Макрон билан учрашиш учун Францияга борган. 

Франция раҳбари сўнгги пайтларда “Ангела Меркелнинг икки давлат ўртасидаги муносабатлардаги фаол роли”, унинг “ўзини тутиши” ва “суҳбатдошни эшитиш қобилияти”ни бир неча бор таъкидлаган. 

Учрашувда Меркелга “Фахрий легион” ордени топширилган. Ушбу мукофот 1802 йилда Франция Республикасининг биринчи консули Наполеон Бонапарт томонидан таъсис этилган. 

Эслатиб ўтамиз, жорий йилнинг 26 сентябрь куни Германияда мамлакат парламенти – Бундестагга сайловлар бўлиб ўтди. Унда Германия социал-демократик партияси (СДП) 25,7 фоиз овоз билан ғалаба қозонди. Ушбу партия етакчиси Олаф Шольц Ангеланинг лавозимига асосий даъвогар бўлиб турибди.