Макрон Фаластинни тан олиш бурч эканини айтди

Франция Президенти Эммануэль Макрон Фаластин давлатини тан олишни “ахлоқий бурч” деб атади. Бу ҳақда у Сингапурдаги Shangri-La Dialogue форумида сўз очди.

Матбуот анжуманида сўзга чиққан Макрон Фаластин давлатини тан олиш муайян шартларга риоя қилиш билан бирга бўлиши кераклигини таъкидлаган. У Фаластин давлати Исроилнинг мавжудлиги ва хавфсизлигини тан олса, ҲАМАС ҳаракати қуролларни ташласа, ҲАМАС Фаластин бошқарувида иштирок этишдан воз кечса ҳамда асирлар озод қилинсагина тинчликка эришиш мумкинлигини айтган.

Франция раҳбари, агар Исроил яқин соатларда ёки кунларда Ғазо секторидаги гуманитар вазиятга мақбул ечим таклиф қилмаса, халқаро ҳамжамият Тель-Авивга нисбатан янада қатъий позиция эгаллаши зарурлигини билдирган.

У Европа Иттифоқи ўз тамойилларига мувофиқ ҳаракат қилиши, инсон ҳуқуқларига ҳурмат асосида шаклланган жараёнларни якунлаши ва санкциялар жорий этишни кўриб чиқиши кераклигини таъкидлаган.

“Биз янада қатъий ҳаракат қилишимиз керак, чунки бу ҳозир зарур бўлиб қолди. Аммо мен ҳали ҳам Исроилнинг позицияси ўзгаришига ва гуманитар ечим топилишига умид қиламан”, деган Макрон.

Маълумот учун, 2023 йилнинг 7 октябрь куни Исроил Ғазога ҳужумларини бошлаганидан бери Франциядаги мухолифат Фаластин давлатини зудлик билан тан олиш талабларини кучайтирди. 2024 йилда Макрон Фаластин давлатини тан олиш Франция учун “табу” эмаслигини айтди.

Эслатиб ўтамиз, аввалроқ ҳам Франция раҳбари Фаластинни тан олиш кераклигини бир неча бор айтган. Илк бор у июнь ойида ўзи ҳамраислик қиладиган икки давлат ечими бўйича халқаро конференция доирасида Франция Фаластин давлатини тан олиши мумкинлигини айтганди. Президентнинг айтишича, конференция Фаластинни тан олиш масаласини ниҳоят ҳал қилишни режалаштирмоқда. Кейинчалик “Israel hayom” нашри ҳам Саудия Арабистони ва Франция жорий йилнинг июнь ойида Исроил иштирокисиз Бирлашган Миллатлар Ташкилоти ҳомийлигида Нью-Йоркда Фаластин давлатини тан олиш бўйича халқаро анжуман ўтказиши ҳақида мақола эълон қилди. Нашрнинг ёзишича, ушбу анжуманда Фаластин давлатини тан олиш бўйича аниқ муддатлар ва ижро механизмларни ўз ичига олган кенг қамровли йўл харитаси ишлаб чиқилиши режалаштирилган. Франция ва Саудия вакиллари бошчилигида бўлиб ўтадиган анжуманда мунозаралар ва расмий сессиялар ўтказилади ҳамда Фаластин давлатини барпо этиш учун амалга ошириладиган доиравий режа ишлаб чиқилади. Ушбу ташаббус Исроилнинг бу борадаги позициясини бутунлай четлаб ўтади. Қолаверса, 19 май куни кечқурун Елисей саройи матбуот хизмати уч давлат раҳбарларининг қўшма баёнотида Франция Президенти Эммануэль Макрон ҳамда Буюк Британия ва Канада Бош вазирлари Кир Стармер ва Марк Карни Исроилнинг Ғазода жанговар ҳаракатларни қайта бошлаганига кескин қарши чиқди ҳамда Исроил ҳукуматини “ўзининг жирканч баёнотлари” учун танқид қилганди. Нетаньяху, ўз навбатида, баъзи Ғарб давлатлари раҳбарларининг бундай баёнотлари ўринсиз, деган фикрни билдирди.